JONA 2 - SetswanaTswana 1908/1992（TSW08NO）

Thapelo ya ga Jona

1Foo Jona a rapela Jehofa Modimo wa gagwe, a le mo mpeng ya leruarua.

2A re:

“Ka ntlha ya pitlagano ya me

ka biletsa kwa go Jehofa,

mme a nkaraba, ka goa

ke le mo mpeng ya Bobipo,

mme wa utlwa lentswe la me.

3Gonne o ne wa ntatlhela

mo botenyeng,

mo pelong ya mawatle,

mme morwalela

o ne o ntsentse gare;

dintelo tsotlhe tsa gago,

le makhubu a gago a metsi

a ne a ntlolela godimo.

4Mme ka re:

‘Ke latlhegetse koo kwa ntle

fa pele ga matlho a gago;

le fa go ntse jalo

ke tlaa ba ke leba

kwa tempeleng ya gago

e e boitshepo.’

5Metsi a ne a mpharafere,

go ya go fitlha le kwa moweng;

boteng bo ne bo le tikologong

ya me;

malele a ne a ntharile tlhogo.

6Ka fologela

kwa metheong ya dithaba;

lefatshe ka mephakalego ya lone

la ntswalegela ka bosakhutleng;

le fa go ntse jalo

o ntshitse botshelo jwa me

mo moleteng,

wena Jehofa Modimo wa me.

7E rile mowa wa me o idibala

mo teng ga me,

ka gakologelwa Jehofa;

morapelo wa me

wa ya go tsena kwa go wena,

mo tempeleng ya gago

e e boitshepo.

8Ba ba tlhokomelang maithamako

a maaka

ba tlogela boutlwelobotlhoko

jwa bone ka bosi.

9Mme nna ke tlaa go isetsa setlhabelo

ka lentswe la tebogo;

ke tlaa lefa se ke se ikanneng.

Poloka ke ya ga Jehofa.”

10Mme Jehofa a bua le leruarua, mme la tlhatsetsa Jona mo lefatsheng la komelelo.