1Go bua jaana Jehofa, a re:
“Lo kae lokwalo lwa go
tlhalwa ga mmaa lona,
lo ke mo tlhadileng ka lone?
Gongwe ke ofe wa ba ke tshotseng
molato mo go bone
yo ke lo bapaditseng mo go ene?
Bonang, lo bapaditswe ka ntlha ya
maikepo a lona,
mme ke ka ditlolo tsa lona
mmaa lona a tlhadilwe.
2Ke ka ntlha yang, nna e rile ke tla,
ga bo go se na motho ope?
E rile ke bitsa,
ga bo go se na ope yo o arabang?
A letsogo la me le ngotlafetse,
mo le palelwang ke go rekolola?
Gongwe a ga ke na thata
ya go golola?
Bonang, ka kgalemo ya me,
ke kgadisa lewatle,
le dinoka ke di dira naga fela;
ditlhapi tsa tsone di nkge sebodu,
ka go se na metsi, di swa ka lenyora.
3Ke apesa magodimo mafifififi,
ke dira letsela la kgetse
go nna sebipo sa one.”
Boikobo jwa motlhanka wa Modimo4Morena Modimo o nneile loleme
lwa ba ba rutegileng,
gore ke tle ke itse go kamatlela
ka puo ene yo o lapileng;
o tlaa a ntsose ka moso moso,
a tsosetse tsebe ya me
go utlwa jaaka ba ba rutegileng.
5Morena Modimo
o nkabolotse tsebe,
mme ga ke a ka ka dira setloontheng
le fa e le go ithuhulela kwa morago.
6 Baditei ka ba neela motlhana wa me,
le marama a me ka a neela ba ba
khumolang ditedu;
sefatlhogo sa me
ga ke a ka ka se subela ditlhong
le kgwelo ya mathe.
7Gonne Morena Modimo
o tlaa nthusa; ke gone
ka fa ke sa sosobaganang ka teng;
ke gone ke beileng sefatlhogo sa me
jaaka legakwa fela, mme ke a itse
fa ke se ketla ke tlhajwa ke ditlhong.
8 O gaufi yo o ntshiamisang;
yo o tlaa ganelang le nna emang?
A re emeng mmogo;
moganetsi wa me emang?
A a nkatamele.
9Bonang, Morena Modimo
o tlaa nthusa;
emang yo o tlaa ntshekisang?
Bonang, bone ba tlaa onala botlhe
jaaka seaparo;
motoutwana o tlaa ba jela ruri.
10Emang mo go lona
yo o boifang Jehofa,
yo o akelang lentswe
la motlhanka wa gagwe,
yo o tsamayang mo lefifing,
mme a se na lesedi? A a ikanye mo
ineng la ga Jehofa,
a ikaege Modimo wa gagwe.
11Bonang, lona lotlhe
ba lo gotsang molelo,
ba lo itlamang ka ditime;
tsamayang mo kgabong ya molelo
wa lona le mo dirumoleng
tse lo di tshubileng.
Go mo, lo tlaa go bona
mo seatleng sa me; gore
lo tlaa robalela mo bohutsaneng.
Who We AreWhat We EelieveWhat We Do
2025 by iamachristian.org,Inc All rights reserved.
