1“A ga se go re motho
o na le lobaka lwa tirelo
mo lefatsheng?
A malatsi a gagwe
ga a tshwane le malatsi
a yo o thapilweng ka tuelo?
2Jaaka motlhanka yo o eletsang thata
go bona moriti go feta,
le jaaka mothapiwa
yo o lebeletseng tuelo ya gagwe;
3jalo le nna ke ruisiwa dikgwedi
tsa boithamako,
ke laoletswe masigo
a a tlhobaedisang.
4E tle e re ke itelega,
ke a tle ke re:
‘Ke tlaa tsoga leng?’
Mme bosigo bo nne boleele;
ke tlale diphethekgano
go tsamaye bosigo bo se.
5Nama ya me e apesitswe diboko
le lorole lo lo makote;
letlalo la me le tle le kopane
mme le itse go phanyega seša.
6Malatsi a me a bofefo
bogolo go selogi sa monyedi,
a feta fela a se na tsholofelo.
7“A ko o gakologelwe go re
botshelo jwa me ke phefo fela,
leitlho la me ga le ketla le tlhola
le bona molemo.
8Leitlho la yo o mponang
ga le ketla le tlhola le nteba;
matlho a gago
a tlaa nna mo go nna,
mme ke tlaa bo ke seyo.
9Jaka leru le tle le nyelele,
mme le kaologele koo,
go ntse jalo,
le ene yo o fologelang mo Bobipong
ga a ketla a tlhola a tlhatloga.
10Ga a ketla a tlhola a boela
kwa ntlong ya gagwe,
le gone felo ga gagwe
ga go ketla go tlhola go mo itse.
11“Ke gone
ga nketla ke kganela molomo wa me;
ke tlaa bua
mo tlalelong e e mahehe
ya mowa wa me;
ke tlaa itoka
mo botlhokong jwa botshelo jwa me.
12A ke lewatle,
kgotsa leruarua la lewatle,
fa e bo ne ne o mpeela tebelo jaana?
13Ya re fa ke re:
‘Bolao jwa me bo tlaa nkgomotsa,
sesekamelo sa me
se tlaa fefofatsa boitoko jwa me;’
14foo o tle o ntshose ka ditoro,
mme o ntheregise
ka diponatshegelo.
15Jalo mowa wa me
o bo o tle o rate go betwa,
o eteletse loso,
bogolo go marapo a, a me.
16Botshelo jwa me
bo mpherosa sebete;
ga ke rate ka tshelela ruri;
ntesa, gonne malatsi a me
ke boithamako fela.
17 Motho e a bo e le eng,
fa e bo ne ne o mo godisa,
o ba o tlhoma pelo ya gago
mo go ene,
18o mo tlhola ka meso yotlhe,
o mo leka ka nako nngwe le nngwe?
19Ana o tlaa gana ka lobaka lo lokae
go faposa matlho mo go nna,
le go ntesa
ke tle ke metse mathe a me.
20Fa ke leofile, ke go direlang,
wena molebedi wa batho?
Ana o ipeela sekonopiwa ka nna
ka ntlha yang?
Ke ba ke tla ke imelwa
ke sebele sa me nna ka nosi.
21Ga o itshwareleleng tlolo ya me,
wa tlosa boikepo jwa me?
Gonne ke tloga ke itelega
mo loroleng;
o tlaa mpatla ka tlhoafalo,
mme ke tla bo ke seyo.”
Who We AreWhat We EelieveWhat We Do
2025 by iamachristian.org,Inc All rights reserved.
