PESALEMA 12 - SetswanaTswana 1908/1992（TSW08NO）

Thapelo ya go thusiwa kgatlhanong le baikepiPesalema ya ga Dafite. Ya moopedi yo mogolo; e laeletswe Sheminitha.

1Thusa Jehofa; gonne

mmoifa Modimo o a khutla;

gonne ba ba ikanyegang

ba a tlhaela mo baneng ba batho.

2Ba bua boithamako,

mongwe le mongwe le wa ga gabo;

ba bua ka dipounama tse di hakang

le ka pelo e e leng pedi.

3Jehofa o tlaa kgaola dipounama

tsotlhe tse di hakang,

e bong loleme lo lo buang

dilo tse dikgolo;

4ba ba rileng:

“Re tlaa fenya ka loleme lwa rona;

dipounama ke tsa rona fela;

e mang yo e leng morena

godimo ga rona?”

5“Jaanong, ke tlaa tloga

ke tsogela kgapelo ya bahumanegi,

le phegelo ya batlhoki,”

go bua Jehofa;

“mme ene yo ba mo budulang

ke tlaa mmaya mo polokegong.”

6Mafoko a ga Jehofa

ke mafoko a a itshekileng;

a ntse jaaka selefera se se lekilweng

mo boubelong mo mmung,

se itshekisitswe ga supa.

7Wena, Jehofa o tlaa ba boloka,

o tlaa ba dibela mo losikeng lo

ka bosakhutleng.

8Baikepi ba tsamayatsamaya

ka ntlha tsotlhe mogang bomaswe

bo godisiwang mo baneng ba batho.