PESALEMA 9 - SetswanaTswana 1908/1992（TSW08NO）

Malebogo a tshiamo ya ModimoPesalema ya ga Dafite. Ya moopedi yo mogolo; e laeletswe Muthe-labene.

1Ke tlaa leboga Jehofa

ka pelo yotlhe ya me;

ke tlaa bolela ditiro tsotlhe tsa gago

tse di gakgamatsang.

2Ke tlaa ipela ke kgana ka boitumelo

mo go wena;

ke tlaa opelela leina la gago pako,

wena Mogodimodimo;

3e a re baba ba me ba boela

kwa morago, ba kgopiwe,

ba nyelele ka sebonalo sa gago.

4Gonne o emetse tshiamo ya me

le go seka ga me;

o ne o dutse mo setulong sa bogosi

o atlhola ka tshiamo.

5O kgalemetse merafe,

o sentse baikepi,

o timeditse leina la bone

ka bosakhutleng le ka bosaengkae.

6Baba ba feletse ruri,

ba swafetse ka bosakhutleng;

le metse e o e pitikolotseng,

le e leng go gopolwa ga yone

go nyeletse fela nayo.

7Jehofa o dutse e le kgosi

ka bosakhutleng;

setulo sa gagwe sa bogosi

o se baakanyeditse katlholo.

8O tlaa atlhola lefatshe ka tshiamo;

o tlaa direla ditšhaba katlholo

ka thokgamo.

9Gape, Jehofa o tlaa nna kago

e e godileng ya botshabelo

jwa bone ba ba patikwang,

kago e e godileng ya botshabelo

mo metlheng ya dipitlagano;

10ba ba itseng leina la gago

ba tlaa ikanya mo go wena;

gonne wena, Jehofa,

ga o a latlha ba ba go batlang.

11Opelelang Jehofa

yo o agileng mo Sione dipako;

bolelang mo ditšhabeng

ditiro tsa gagwe.

12Gonne yo o lefetsang tshololo

ya madi o a ba gakologelwa;

ga a lebale go goa ga bahumanegi.

13Nkutlwela botlhoko, Jehofa;

leba go patikwa ga me

ke ba ba nkilang,

wena yo o ntlhatlosang

mo dikgorong tsa loso;

14gore ke tle ke bonatse

pako yotlhe ya gago;

ke tlaa re mo dikgotleng

tsa morwadia Sione

ke itumele mo polokeng ya gago.

15Merafe e ribegetse

ka lemena le e le dirileng;

lonao lwa bone ka bosi lo tshwerwe

ke lotloa lo ba lo thaileng mo phitlhong.

16Jehofa o ipoletse,

o dirile tshekiso;

moikepi o tshwarisitswe ke tiro

ya diatla tsa gagwe ka esi.

HIGAIONE. Sela.

17Baikepi ba tlaa boela Bobipong,

e bong merafe yotlhe

e e lebalang Modimo.

18Gonne batlhoki ga ba ketla

ba lebalwa ka metlha yotlhe,

le fa e le tebelelo ya bahumanegi

ga e ketla e nyelela

ka bosakhutleng.

19Tloga o eme, Jehofa,

a motho a se fenye;

a merafe e atlholwe

mo ponong ya gago.

20Jehofa, ba boifise;

a merafe e ikitse fa e le batho fela.

Sela.