1O emetseng kgakala, Jehofa?
O iphitlhelang mo metlheng ya
pitlagano?
2Mohumanegi o khukhelwa
ka tlhoafalo
ka boikgodiso jwa baikepi;
a ba tshwarwe ka ditogamaano
tse ba di logileng.
3Gonne moikepi o belafala
ka ga keletso ya pelo ya gagwe,
le yo o pelotshetlha o a itatola,
ee, o kgala Jehofa.
4Moikepi o bua ka boikgodiso
jwa sefatlhogo sa gagwe, a re:
“Ga o ketla o go lefetsa.”
Megopolo yotlhe ya gagwe
ke go re: “Ga go na Modimo ope.”
5Ditsela tsa gagwe ke mo go
tlhomameng ka metlha yotlhe;
dikatlholo tsa gago
di kwa godimodimo
kgakala le pono ya gagwe;
mme ka ga baba ba gagwe
botlhe, o ba budula fela.
6O ithaya mo pelong ya gagwe a re:
“Ga nketla ke tshikinyega;
ga nketla ke ba ke nna mo bothateng
bope mo tshikatshikeng.”
7 Legano la gagwe le tletse
khutsakanyo le tsietso le patiko;
kwa tlase ga loleme lwa gagwe
go na le bosenyi le boikepo.
8O a tle a dule
mo mafelong a talelo a metsana;
a bolaele ba ba se nang molato
mo mafelong a boiphitlho;
ba ba se nang boithuso
a ba gotolele matlho.
9O a tle a lalele mo setswatswaneng
jaaka tau mo selaong sa yone,
a lalele mohumanegi go mo tshwara;
o mo tshware ruri, ene mohumanegi,
mogang o mo gogang
ka lotloa lwa gagwe.
10O a tle a bobe, a iname,
mme ba ba se nang boithuso ba we
ka ba ba thata ba gagwe.
11O ithaya mo pelong ya gagwe a re:
“Modimo o lebetse;
o bipile sefatlhogo sa one;
ga o ketla o go bona gope.”
12Tloga o eme, Jehofa!
Modimo, tsholetsa letsogo la gago;
o se ka wa lebala bahumanegi.
13Ana moikepi o nyaletsang Modimo;
a ithaya mo pelong a re:
“Ga o ketla o go lefetsa”?
14O go bonye;
gonne o lebile bosenyi
le bopeloyatlhoi
go bo tsaya mo seatleng sa gago;
yo o se nang boithuso
o itesa mo go wena;
o ne o ntse o le mothusi wa masiela.
15Roba letsogo la moikepi;
motho yo o bosula ene, o no o
tlhotlhomise boikepo jwa gagwe,
o bo o tle o se ka
wa tlhola o bona bope.
16Jehofa ke Kgosi ka bosakhutleng
le ka bosaengkae;
baditšhaba ba nyeleletse ruri
mo lefatsheng la gagwe.
17Jehofa, o utlwile keletso
ya baikokobetsi;
o tlaa baakanya pelo tsa bone,
o tlaa tlhwaa tsebe ya gago go utlwa;
18go tla o atlhola masiela le bapatikwi,
gore motho yo e leng
wa lefatshe fela
a se ka a tlhola a boitshega gope.
Who We AreWhat We EelieveWhat We Do
2025 by iamachristian.org,Inc All rights reserved.
