1Mme jaanong,
go bua jaana Jehofa
yo o go tlhodileng,
wena Jakobe, ene yo o go bopileng,
wena Iseraele; a re:
“O se ka wa boifa,
gonne ke go rekolotse;
ke go biditse ka leina la gago,
o wa me.
2E tlaa re o ralala metsi
ke tlaa bo ke na nao;
le o ralala dinoka
ga di ketla di go penamela;
mogang o ralalang molelo,
ga o ketla o ša;
le kgabo ga e ketla e tuka
mo go wena.
3Gonne ke Jehofa Modimo wa gago,
Moitshepi wa Iseraele,
mmoloki wa gago;
ke ntshitse Egepeto
go nna serekololo sa gago,
ka ntsha Ethiopia le Seba
boemong jwa gago.
4E re ka o ntse o le seetlaetlana
mo matlhong a me,
o le tlotlego, mme ke go ratile,
ke gone ke tlaa ntshang batho
boemong jwa gago, le ditšhaba
boemong jwa botshelo jwa gago.
5O se ka wa boifa;
gonne ke na nao;
ke tlaa tlisa losika lwa gago
lo tswa kwa botlhabatsatsi,
ke go phutha
go tswa bophirimatsatsi.
6Ke tlaa raya Botsheka ke re:
‘Ntsha;’ ke raya Borwa ke re:
‘Se kganele;’
tlisang bomorwaake go tswa kgakala,
le bomorwadiake go tswa sekhutlong
sa lefatshe.
7E bong mongwe le mongwe
yo o bidiwang ka leina la me,
yo ke bileng ka mo tlholela
kgalalelo ya me;
nna ke mmopile;
ee, nna ke mo dirile.”
Iseraele ke mosupi wa ga Jehofa8Ntshang ba ba difofu
tse di nang le matlho,
le ba ba bosusu
ba ba nang le ditsebe.
9A merafe yotlhe e phuthwe,
a ditšhaba di kokoanngwe;
e mang mo go bone
yo o ka bolelang golo mo,
a re supetsa dilo tsa pele?
A ba tlise basupi ba bone,
gore ba tle ba siamisiwe;
kgotsa a ba utlwe, mme a ba re:
“Ke boammaaruri.”
10“Lona lo basupi ba me,”
go bua Jehofa:
“o bile o motlhanka wa me
yo ke go itshenketseng;
gore lo tle lo itse,
lo ntumele, lo bo lo tlhaloganye
fa ke le ene;
e rile pele ga me
ga bo go sa bopiwa modimo ope,
le gone ga go ketla go nna ope
morago ga me.
11Nna e leng nna, ke Jehofa,
mme kwa ntle ga me
ga go na mmoloki ope.
12Ke kakantse, ke bolokile,
ke supile, mme go ne go se na
modimo ope
wa seeng mo go lona:
ke gone lo leng basupi ba me,”
go bua Jehofa,
“mme ke nna Modimo.
13Ee, e sa le ka go nna motshegare
ke ntse ke le one;
mme ga go na ope
yo o ka gololang mo seatleng sa me;
ke tlaa nna ke dira fela,
mme e mang
yo o tlaa kgoreletsang?”
Jehofa o solofetsa go tshabisa morafe wa gagwe kwa Babilone14Go bua jaana, Jehofa, morekolodi wa lona, Moitshepi wa Iseraele; a re:
“Ke romile kwa Babilone
ka ntlha ya lona,
mme ke tlaa ba folosa botlhe
fela jaaka bafaladi,
e bong Bakalatea
ba le mo dikepeng tsa bone
tse ba di itumelelang.
15Ke nna Jehofa Moitshepi wa lona,
Motlhodi wa Iseraele,
Kgosi ya lona.”
16Go bua Jehofa
yo o dirang mmila mo lewatleng,
le tsela mo metsing
a a bokete jo bo thata;
17yo o bolotsang kara ya tlhabano
le pitse, ntwa le nonofo;
ba lalaana mmogo,
ga ba ketla ba tsoga, ba figitlhegetse,
ba timile jaaka lodi:
18“Lo se ka lwa gakologelwa
dilo tsa pele,
le gone lo se ka lwa akanya
dilo tsa bogologolo.
19Bonang, ke tlaa dira sengwe se seša;
se tlaa runya jaana jaana;
a ga lo ketla lo se itse?
ke tlaa dira tsela fela mo nageng,
le dinoka mo sekakeng.
20Ditshedi tsa naga di tlaa ntlotla,
diphokoje le bontšhe;
gonne ke baya metsi mo nageng,
le dinoka mo sekakeng
go tla ke nosa batho ba me,
baitshenkedwi ba me:
21E bong batho ba ke ba ipopetseng,
gore ba tle ba ranole pako ya me.”
Sebe sa Iseraele22“Le fa go ntse jalo ga o a mpitsa,
wena Jakobe;
mme o lapisitswe ke nna,
wena Iseraele.
23Ga o a nteretse dikwanyana
tsa ditshupelo tsa gago tsa phiso;
le gone ga o a ntlotla
ka ditlhabelo tsa gago.
Nna, ga ke a go kgwelea
ka ditshupelo,
le gone ga ke a go lapisa ka maswalo.
24Wena ga o a nthekela ntšhe ka madi,
le gone ga o a nnyamuka
ka mafura a ditlhabelo tsa gago:
o nkimedisitse ka maleo a gago,
o ntapisitse ka maikepo a gago.
25Ke nna, e leng nna,
yo ke phimolang ditlolo tsa gago
ka ntlha ya me;
le maleo a gago
ga nketla ke a gakologelwa.
26O tle o nkgakolole;
a re rapelane; ranola kgang ya gago,
gore o tle o siamisiwe.
27Rraago wa ntlha o ne a leofa,
le baphuthololedi ba gago ba tlodile
fa pele ga me.
28Ke gone ka moo
ke tlaa tlhapatsang dikgosana
tsa felo ga boitshepo,
ke tlaa dira Jakobe seneelelwa,
le Iseraele kgobo.”
Who We AreWhat We EelieveWhat We Do
2025 by iamachristian.org,Inc All rights reserved.
