1Jehofa o bua jaana, a re: “Ya kwa ntlong ya kgosi ya Juta, mme o bue teng lefoko le, o re:
2‘Utlwa lefoko la ga Jehofa, wena kgosi ya Juta, yo o dutseng mo setulong sa ga Dafite sa bogosi, wena, le batlhanka ba gago, le batho ba gago ba ba tsenang ka dikgoro tse.
3Jehofa o bua jaana, a re: Dirafatsang tshiamiso le tshiamo, lo golole ba ba thopilweng mo seatleng sa mopatiki; se direng tshiamololo epe, se senyetseng moeng, le fa e le lesiela, le fa e le mosadi wa motlholagadi, le gone se tshololeleng madi a a se nang molato mo felong fa.
4Gonne fa ruri lo dira selo se, foo go tlaa tsena ka dikgoro tsa ntlo e, dikgosi tse di dutseng mo setulong sa ga Dafite sa bogosi, di palame mo dikareng, le mo dipitseng, yone le batlhanka ba yone le batho ba yone.
5 Mme fa lo gana go utlwa mafoko a, ke ikana ka nna ka nosi, go bua Jehofa, ka re: Ntlo e e tlaa nna tshwafalo fela.’ ”
6Gonne Jehofa o bua jaana ka ga ntlo ya kgosi ya Juta, a re: “O Gileate mo go nna, le tlhogo ya Lebanone; le fa go ntse jalo ruri ke tlaa go ntsha naga fela, le metse e e sa nnweng.
7Ke tlaa go baakanyetsa basenyi, mongwe le mongwe a na le dibolao tsa gagwe; mme ba tlaa rema masetara a gago a a tlhophegileng, ba a latlhela mo molelong.
8“Merafe e le mentsi e tlaa feta ka motse o, mongwe le mongwe o tlaa raya yo o bapileng nae, a re: ‘Ana Jehofa o diretse motse o mogolo o jaana ka ntlha yang?’
9Foo ba tlaa fetola, ba re: ‘Ke ka gonne ba latlhile kgolagano ya ga Jehofa Modimo wa bone, ba obamela medimo e sele, ba e direla.’ ”
Molaetsa wa ga Jeremia kwa go Joase10Se seleleng moswi,
le fa e le go mo thukhuthela tlhogo;
mme yo o tsamaelang koo
lo mo lelele thata;
ka a se ketla a tlhola a boa,
le fa e le go bona
lefatshe la ga gabo.
11 Gonne Jehofa o bua jaana ka ga Shalume morwa Josia, kgosi ya Juta, yo o busitseng mo boemong jwa ga Josia rraagwe, yo o ne a tswa mo felong fa: “Ga a ketla a tlhola a boela teng gope.
12Mo felong kwa ba mo isitseng a le setshwarwa teng, o tlaa swela teng, mme ga a ketla a tlhola a bona lefatshe le gope.”
Molaetsa wa ga Jeremia o o amanang le Jehoiakime13A bo go latlhega motho
yo o agang ntlo ya gagwe
ka tshiamololo,
le matlwana a gagwe ka patiko,
yo o dirisang wa ga gabo
ka go mo tlhokisa maduo,
a sa mo neye tuelo ya
tiro ya gagwe;
14yo o reng:
“Ke tlaa ikagela ntlo e e atlhameng,
le matlwana a kgatshimolo,”
mme a iphunyetse diipone;
e khurumediwe kwa godimo
ka masetara,
e be e tshasiwe bohibidu
jo bontle.
15A o tlaa busa
ka go bo o leka thata go gaisa
ba bangwe ka masetara?
A rraago o ne a se ka a ja, a nwa,
a ba a dira katlholo le tshiamiso,
foo ga nna molemo mo go ene?
16O ne a atlhola mafoko a bahumanegi
le batlhoki; foo ga nna molemo.
A e ne e se gone go nkitse?
Go bua Jehofa.
17Matlho a gago ga a ope,
le pelo ya gago ga e gope,
fa e se mo papading e e sa siamang,
le mo go tshololeng madi a a se
nang molato, le mo patikong,
le mo go thubakeng, go go dira.
18 Ke gone ka moo Jehofa o bua jaana ka ga Jehoiakime morwa Josia, kgosi ya Juta, a re: “Ga ba ketla ba mo hutsafalela, ba re:
“ ‘Jo we, ngwana a rre!’
Kgotsa: ‘Jo we, kgaitsadiake!’
Ga ba ketla ba mo hutsafalela, ba re:
‘Jo we, morena!’ Kgotsa: ‘Jo we,
kgalalelo ya gagwe!’
19O tlaa fitlhwa wa phitlho ya esela,
a gogwa
a ya go latlhelwa kwa ntle
ga dikgoro tsa Jerusalema.”
Molaetsa wa ga Jeremia ka ga bofelelong jwa Jerusalema20“Tlhatlogela kwa Lebanone,
o tlhomeletse; o tsholeletse
lentswe la gago mo Bašane;
o tlhomeletse o le mo Abarime;
gonne dinyatsi tsotlhe tsa gago
di sentswe.
21Ka bua nao mo motlheng
wa go segofala ga gago;
mme wa re: ‘Ga nketla ke utlwa.’
E ne e ntse e le one mokgwa
wa gago
e sa le mo borobeng jwa gago,
go re, ga o ko o utlwa lentswe la me.
22Phefo e tlaa ja badisa botlhe
ba gago, dinyatsi tsa gago
di tlaa ya botshwarong;
ruri ka lobaka loo o tlaa bo o
tlhajwa ke ditlhong,
o sosobagana
ka ntlha ya boikepo jotlhe jwa gago.
23Wena monni wa Lebonone,
yo o agang setlahaga sa gago
mo masetareng,
ana o tlaa bo o tlhomola pelo jang
mogang o go inganga go tlang mo go
wena,
e bong botlhoko jaaka jwa mosadi
yo o mo pelegong.”
Katlholo ya Morena mo go Jehoiakime24 “Jaaka ke tshedile,” go bua Jehofa, “le fa Konia morwa Jehoiakime kgosi ya Juta, e ka bo e le sekanelo mo atleng sa me se segolo, le fa go ntse jalo ke ne ke tlaa go somola gone fela;
25ke tlaa go tsenya mo seatleng sa ba ba batlang botshelo jwa gago, le mo seatleng sa ba o ba boifang, e bong mo seatleng sa ga Nebukateresare kgosi ya Babilone, le mo seatleng sa Bakalatea.
26Ke tlaa go latlhela kwa ntle, le mmaago yo o go belegeng, kwa lefatsheng le sele, kwa lo sa tsalelwang teng; mme lo tlaa swela teng.
27Kwa lefatsheng le mowa wa bone o tlhologeletsweng go boela kwa go lone, ga ba ketla ba boela teng.”
28Monna yo Konia, a o pitsana e e thubegileng e e nyatsegang? A o pitsana e e sa kgatlheng gope? Ke ka ntlha yang fa ba latlhelwa kwa ntle, ene le losika lwa gagwe, ba latlhelwa kwa lefatsheng le ba sa le itseng?
29Wena lefatshe, lefatshe, lefatshe!
Utlwa lefoko la ga Jehofa.
30Jehofa o bua jaana, a re:
“Kwalang monna yo,
go re ga a na ngwana,
e le monna yo o se ketlang
a tlhogonolofala
mo metlheng ya gagwe;
gonne ga go na ope
wa losika lwa gagwe
yo o tlaa tlhogonolofalang,
a dula mo setulong sa ga Dafite
sa bogosi,
mme a tlhola a busa gope mo Juta.”
Who We AreWhat We EelieveWhat We Do
2025 by iamachristian.org,Inc All rights reserved.
