1Foo ga fetola Sofare wa Monaamatha a re:
2“Ke gone ka moo megopolo ya me
e nnayang phetolo,
e bong ka ntlha ya go potlaka ga me
mo go nna.
3Ke utlwile kgalemelo
e e ntlhabisang ditlhong,
mowa wa tlhaloganyo ya me
wa mphetola.
4A gale, bogologolo,
e sa le ka motho a bewa
mo lefatsheng,
a o ntse o sa itse se,
5sa go re, go ja koma ga baikepi
go le go khutshwane,
le boitumelo jwa ba ba sa reng
Modimo sepe
bo nna ka ponyo ya leitlho fela?
6Le fa tlotlomalo ya gagwe
e palamela kwa magodimong,
le tlhogo ya gagwe
e fitlha kwa marung;
7le fa go ntse jalo o tlaa felela ruri
ka bosakhutleng
jaaka maswe a gagwe;
ba ba mmonyeng ba tlaa re:
‘O kae?’
8O tlaa fofela koo fela jaaka toro,
mme ga a ketla a fitlhelwa;
ee, o tlaa alolwa
jaaka ponatshegelo ya bosigo.
9Leitlho le le kileng la mmona
ga le ketla le tlhola le mmona gope;
le gone felo ga gagwe
ga go ketla go tlhola go mo leba.
10Bana ba gagwe ba tlaa batla
botsalano jwa bahumanegi,
diatla tsa gagwe
di tlaa rebola khumo ya gagwe.
11Le fa marapo a gagwe
a tletse bokolwane,
bo tlaa itelega nae mo loroleng.
12le fa boikepo bo le botshe
mo ganong la gagwe,
le fa a bo suba
fa tlase ga loleme lwa gagwe;
13le fa a bo rekegela,
a gana go bo lesa,
mme a ntse a bo tshegeditse fela
mo teng ga legano la gagwe;
14le fa go ntse jalo,
dijo tsa gagwe di fetogile
mo maleng a gagwe,
ke botlhoko jwa dinenebu
mo teng ga gagwe.
15O komeditse dikhumo,
mme o tlaa ba a di tlhatsa;
Modimo o tlaa di gelola
mo mpeng ya gagwe.
16O tlaa mona botlhoko jwa dinenebu;
lolema lwa šaušawane
lo tlaa mmolaya.
17Ga a ketla a leba dinoka,
dinokana tse di elang dinotshe
le madila a maši.
18Se o ne a se itapisetsa
o tlaa se busa, mme
ga a ketla a se meletsa mo teng;
ga a ketla a itumelela thoto
e o e bapetseng.
19Gonne o patikile a latlha
bahumanegi;
o gapile ntlo ka thata,
e o ne a se ka a e aga.
20“E re ka a ne a sa itse boiketlo
mo teng ga gagwe,
ga a ketla a sala le sepe
sa se o ne a itumela mo go sone.
21Ga se ka ga sala sepe
se o sa se jelang ruri;
ke gone ka moo
go tlhogonolofala ga gagwe
ga go ketla go tlhomama.
22O tlaa re mo botlalong
jwa letlotlo la gagwe
a nne mo pitlaganong;
seatla sa mongwe le mongwe
yo o mo matladikeng
se tlaa wela mo go ene.
23E tlaa re mogang o reng o kgora
mo mpeng,
Modimo o latlhele bogale
jwa tšarologo ya one mo go ene,
o tlaa bo kgoromeletsa mo go ene
a sa ntse a ja.
24O tlaa tshaba sebolao sa tshipi,
bora jwa kgotlho
bo tlaa mo phololetsa.
25Fa mongwe a o somola,
o tswe mo mmeleng wa gagwe;
ee, segale se se phatsimang
se tswe mo santlhokweng wa gagwe;
ditheregiso di mo go ene.
26Lefifi lotlhe le beetswe
dikhumo tsa gagwe tse di rategang;
molelo o o sa butswelwang ke motho
o tlaa mo laila;
o tlaa nyeletsa se se setseng
mo mogopeng wa gagwe.
27Magodimo a tlaa senola
boikepo jwa gagwe,
le lefatshe le tlaa mo tsogologela.
28Totafalo ya ntlo ya gagwe
e tlaa tloga,
dithoto tsa gagwe di tlaa elela koo
mo tsatsing la botšarara jwa one.
29Kabelo ya moikepi ke eo,
e tswa mo Modimong,
le boswa jo o bo laoletsweng
ke Modimo.”
Who We AreWhat We EelieveWhat We Do
2025 by iamachristian.org,Inc All rights reserved.
