1Foo Jobe a fetola a re:
2“Lo bo lo utlweng puo ya me
sentle;
mme se e nne dikgomotso tsa lona.
3Ntesang, le nna ke tlaa bua;
ke tlaa re ke sena go bua,
lo sotlele pele fela.
4Ka ga me, go itoka ga me
a ke go itokela motho?
Ke tlaa bo ke sa nne legweegwee
ka ntlha yang?
5Lo nkele tlhoko, lo gakgamale,
mme lo ipeye seatla mo melomong.
6Ee, le e tle e re fa ke gakologelwa
ke huduege,
le go tsitla marapo go ntshware.
7Ana baikepi ba tshela ka ntlha yang
ba tsofale,
ee, ba natlafale mo nonofong?
8Losika lwa bone lo tlhomame nabo
mo ponong ya bone,
le lotsalo lwa bone
mo matlhong a bone.
9Mantlo a bone a dibelesege
mo poifong,
le gone thupa ya Modimo
ga e ke e nna mo go bone.
10Poo ya bone e gwele fela
e se ke e tlhaele;
kgomo ya bone e tsale
e se ke e folotse.
11Ba tle ba bolotse banyana ba bone
jaaka letsomane,
mme bana ba bone ba bine.
12Ba opelele meropana le harepe,
ba itumelele go lediwa ga lotlhaka.
13Ba fetise malatsi a bone
mo tlhogonolofalong,
mme e a re ka ponyo ya leitlho
ba kotlomelele fela mo Bobipong.
14Le fa go ntse jalo,
ba reile Modimo ba re:
‘Tloga mo go rona;
gonne ga re eletse kitso
ya ditsela tsa gago.
15Mothatayotlhe ya bo e le eng,
fa e bo ne ne re ka mo direla?
Re tlaa bo re bona molemo wang
fa re mo rapela?’
16Bona, go tlhogonolofala ga bone
ga go mo seatleng sa bone;
kgakololo ya baikepi
ke kgakala nayo.
17Lobone lwa baikepi
lo tle lo tingwe ga kae?
Tatlhego ya bone
e tle e ba tlele ga kae?
Modimo o tle o abe mahutsana
mo bogaleng jwa one ga kae?
18Fa ba tla bo ba ka nna ga kae
jaaka dirine fa pele ga phefo,
le jaaka mmoko
o setsuatsue se o tsubulang?
19Lo a tle lo re:
‘Modimo o beela bana ba gagwe
boikepo jwa gagwe.’
A o bo lefetse mo go ene ka esi
gore a bo ikitse.
20A matlho a gagwe ka osi
a bone tshenyego ya gagwe,
a a nwe botšarara
jwa Mothatayotlhe.
21Gonne o na le go kgatlhwa ke eng
mo ntlong ya gagwe
morago ga gagwe,
etswa palo ya dikgwedi tsa gagwe
e kgaotswe ka bogare?
22A mongwe o ka ruta Modimo kitso,
etswa o atlhola bogoletsegi?
23Mongwe o swa a tletse nonofo
a iketlile,
a ituletse gotlhe fela.
24Mabele a gagwe a tletse maši,
le moko wa marapo a gagwe
o mahura fela.
25Yo mongwe a swe
a le mowa o botlhoko,
le a e se ke a utlwe
se se molemo gope.
26Ba itelege mmogo fela
ka bobedi mo loroleng,
mme seboko se ba khurumetse.
27“Bonang, ke a e itse
megopolo ya lona,
le maano a lo a ntogelang
ka go sa siamang.
28Gonne lwa re:
‘Ntlo ya kgosana e kae?
Le mogope o moikepi o kileng
a o nna o kae?’
29A ga lo a botsa bone
ba ba fetang le tsela?
A ga lo itse dikao tsa bone?
30Go re motho yo o bosula
o rekegelelwa letsatsi la tatlhego,
le go re ba gogelwa koo
kwa letsatsing la botšarara?
31E mang yo o tlaa bolelang
tsela ya gagwe matlhong a gagwe?
E mang yo o tlaa mo kgopololelang
se o se dirileng?
32Le fa go ntse jalo
o tlaa isiwa kwa lebitleng,
mme ba tlaa lebela phupu ya gagwe.
33Makote a molapo
a tlaa nna botshe mo go ene,
mme batho botlhe
ba tlaa gogegela kwa go ene,
jaaka go ne go le ba ba se nang palo
pele ga gagwe.
34Mme e le foo lo nkgomotsa jang
ka lefela,
ka mo diphetolong tsa lona
go setse boikanyologo fela.”
Who We AreWhat We EelieveWhat We Do
2025 by iamachristian.org,Inc All rights reserved.
