ESEKIELE 24 - SetswanaTswana 1908/1992（TSW08NO）

Setshwantsho sa pitsa e e apayang

1Gape ya re ka ngwaga o o ferang mongwe fela, ka kgwedi ya lesome, ka letsatsi la lesome la kgwedi, lefoko la ga Jehofa la tla mo go nna, la re:

2 “Morwa motho, kwala leina la letsatsi, e bong la letsatsi leno fela. Kgosi ya Babilone e ne ya atamela Jerusalema thata ka lone letsatsi leno fela.

3Ntlo e e borukhutlhi o e bolelele setshwantsho, o ba reye o re:

“Morena Modimo o bua jaana, a re:

Tlhatlayang pitsa e tona,

lo e tlhatleye,

lo bo lo thele metsi mo go yone.

4Lo olele mo go yone dirwe tsa yone,

e bong serwe sengwe le sengwe

se se molemo, serope le letsogo;

lo tsenye marapo a a tlhaotsweng

mo go yone, e tlale.

5Tsayang tse di tlhophilweng tsa

letsomane,

lo tlhatlaganye dikgong

fa tlase ga yone;

a e bele thata.

Ee, a marapo a yone a apewe

mo gare ga yone.”

6Ke gone Morena Modimo o bua jaana, a re: “A bo go latlhega motse o o madi, le pitsa e tona e lesulo la yone le leng mo go yone, e lesulo la yone le iseng le tswe mo go yone! Di inoleng ka monokela; ga e a thelelwa bola.

7Gonne madi a one a mo gare ga one; wa a baya mo lefikeng le le borethe fela; ga o a ka wa a tshololela fa fatshe go tla a o bipa ka lorole.

8Ke beile madi a one mo lefikeng le le borethe fela, gore a se ka a bipiwa, e le gore a tsose tšararego go tla e busolosa.”

9Ke gone ka moo Morena Modimo o bua jaana, a re: “A bo go latlhega motse o o madi! Le gone ke tlaa koela mokoa o nna mogolo.

10Koang dikgong, tukisang molelo, nama a e butswe thata, loisang moro thata, mme marapo a fisiwe.

11Foo lo e tlhatleye e se na sepe mo magaleng a yone, gore e nne molelo, le gore kgotlho ya yone e še, le gore leswe la yone le tlhapologe mo go yone, le gore lesulo la yone le nyelediwe.

12O itapisitse ka tiro; le fa go ntse jalo lesulo la one le legolo ga le tswe mo go one; lesulo la one ga le tswe ka molelo.

13Botlhodi bo mo lesweng la gago; ereka ke go tlhapisitse, mme wa se ka wa tlhapisega, ga o ketla o tlhola o tlhapisiwa gope mo lesweng la gago, go tsamaye ke kgorise tšararego ya me mo go wena.

14Nna Jehofa ke buile; go tlaa dirala, ke tlaa go dira; ga nketla ke bowa ka morago, le gone ga nketla ke rekegela, le gone ga nketla ke ikwatlhaya; ba tlaa go sekisa ka fa ditseleng tsa gago, le ka fa ditirong tsa gago;” go bua Morena Modimo.

Loso lwa mosadi wa ga Esekiele

15Gape lefoko la ga Jehofa la tla go nna, la re:

16“Morwa motho, bona, ke go tlosetsa seeletso sa matlho a gago ka kanyo e le nngwe fela; le fa go ntse jalo o se ka wa hutsafala le fa e le go lela, le gone dikeledi tsa gago a di se tshologe.

17Fegelwa, mme e seng kwa godimo; o se ka wa direla baswi khutsafalelo; rwala tlhoro o e hunele, rwala ditlhako, mme o se ka wa bipa molomo, le gone o se ka wa ja dijo tsa banna.”

18Jalo ka bua le batho go le ka moso; e rile maitseboa mosadi wa me a swa; mme ya re ka moso ka dira jaaka ke laotswe.

19Batho ba nthaya ba re: “Fa e bo ne ne o dira jaana, a ga o nka o re bolelela go re dilo tse di kayang mo go rona?”

20Foo ka ba raya ka re: “Lefoko la ga Jehofa la tla mo go nna, la re:

21Bua le ba ntlo ya Iseraele, o re: Morena Modimo o bua jaana; a re: Bonang, ke tlaa tlhapatsa felo ga me ga boitshepo, boikgantsho jwa thata ya lona, seeletso sa matlho a lona, le sone se mowa wa lona o se ngomogelang pelo, mme bana ba lona ba basimane le ba basetsana ba lo ba tlogetseng ba tlaa wa ka tšhaka.

22Lo tlaa dira jaaka ke dirile; ga lo ketla lo ipipa melomo, le fa e le go ja dijo tsa banna.

23Ditlhoro tsa lona di tlaa nna mo ditlhogong tsa lona, le ditlhako mo dinaong tsa lona; ga lo ketla lo hutsafala le fa e le go lela; lo tlaa tlhorega fela mo maikepong a lona, lo tlaa ba lo sonelana.

24Jalo Esekiele o tlaa nna sesupo mo go lona; lo tlaa dira ka fa go tsotlhe tse o di dirileng; mogang selo se se tlang, foo lo tlaa itse fa ke le Morena Modimo.

25“Wena morwa motho, a ga go ketla go dirafala mo motlheng o ke ba tseelang thata ya bone ka one, boitumelo jwa kgalalelo ya bone, seeletso sa matlho a bone, le se ba tlhomileng pelo ya bone mo go sone, e bong bana ba bone ba basimane le ba basetsana,

26gore e tle e re yo o falolang mo motlheng oo a tle a tle mo go wena, go se go utlwisa mo ditsebeng tsa gago?

27Mo motlheng oo o tlaa tswela mofalodi molomo, o tlaa bua, ga o ketla o tlhola o nna semumu; jalo o tlaa bo o le sesupo mo go bone; mme ba tlaa itse fa ke le Jehofa.”