1Dudueletsa Modimo,
ka modumo wa boitumelo,
wena lefatshe lotlhe:
2Opelela godimo
kgalalelo ya leina la one;
galaletsa pako ya one.
3Raya Modimo o re:
“Ana ditiro tsa gago
di boitshega jang!
Baba ba gago ba tlaa ineela
mo go wena ka ntlha ya
bogolo jwa thata ya gago.
4Lefatshe lotlhe le tlaa go obamela,
le tlaa go opelela;
ba tlaa opelela leina la gago.” Sela.
5Tlang, lo bone ditiro tsa Modimo;
o a boitshega mo go direng ga one
mo baneng ba batho.
6 Lewatle o kile wa le fetola
lefatshe le le omeletseng;
ba ralala noka ka dinao;
gone foo, ra itumela mo go one.
7O busa ka nonofo ya one
ka bosakhutleng;
matlho a one a tlhokometse merafe;
a batsuolodi ba se ikgodise. Sela.
8A ko lo bakeng Modimo wa rona,
lona ditšhaba,
lo utlwatse lentswe la pako ya one;
9o o tshegeleditseng mowa wa rona
mo botshelong, o bo o sa leseletse
dinao tsa rona go tshikinyega.
10Gonne wena Modimo o re lekile;
o re lekile
jaaka selefera se tle se lekwe.
11O ne wa re tlisa mo lotloeng;
wa baya mokgweleo o o botlhoko
mo dinokeng tsa rona.
12Ba ba pagameng o ba re tlodisitse
godimo ga ditlhogo tsa rona;
ra ralala molelo le metsi;
wa re ntshetsa
kwa felong fa go letlotlo.
13Ke tlaa tsena mo ntlong ya gago
ka ditshupelo tsa phiso,
ke tlaa go lefela maikano a me,
14a dipounama tsa me di a boletseng,
le a molomo wa me o a buileng,
jale ka ke le mo pitlaganong.
15Ke tlaa go isetsa ditshupelo tsa phiso,
tsa tse di nonneng,
di na le maswalo a diphelefu;
ke tlaa isa dikgomo
di na le dipodi tshupelo. Sela.
16Ntlong lo utlweng,
lona lotlhe ba lo boifang Modimo,
mme ke tlaa kakanya
se o se diretseng mowa wa me.
17Ke ne ka tlhaeletsa
kwa go one ka molomo wa me,
wa ba wa bakwa thata
ka loleme lwa me.
18Fa nkabo ke ne ka tsaya boikepo tsia
mo pelong ya me,
Jehofa o ne a tlaa se ke a reetse.
19Ruri Modimo o utlwile; o tsere
lentswe la morapelo wa me tsia.
20A go bakwe Modimo
o o se kang wa faposa
morapelo wa me,
le fa e le boutlwelobotlhoko jwa one
go bo faposa mo go nna.
Who We AreWhat We EelieveWhat We Do
2025 by iamachristian.org,Inc All rights reserved.
