2 DITIRAFALO 10 - SetswanaTswana 1908/1992（TSW08NO）

Merafe ya Bokone e tsogologela Rehoboame(1 Dikg 12:1-20)

1Rehoboame a ya Shekeme, gonne Baiseraele botlhe ba ne ba tsile mo Shekeme ba tla go mo dira kgosi.

2Ga dirala ya re Jeroboame morwa Nebate a go utlwela, (gonne o ne a le kwa Egepeto kwa o ne a tshabetse gone a tswa mo ponong ya kgosi Solomone), Jeroboame a bowa kwa Egepeto.

3Mme ba roma ba ya go mmitsa; Jeroboame a tla a na le Baiseraele botlhe, mme ba bua le Rehoboame ba re:

4“Rraago o ne a dira jokwe ya rona ya nna botlhoko; mme jaana wena, tlhofofatsa tirelo e e botlhoko ya ga rraago, le jokwe e e bokete e o ne a e baya mo go rona, mme re tlaa go direla.”

5Mme a ba raya a re: “Lo tle lo tle gape kwa go nna go sena go feta malatsi a le mararo.” Mme batho ba tsamaya.

6Kgosi Rehoboame a gakololana le bannabagolo ba ba neng ba ema fa pele ga Solomone rraagwe a sa ntse a tshedile, a re: “Lo nnaya kgakololo efe, gore ke tle ke busetse batho ba phetolo?”

7Ba bua nae ba re: “Fa o nna pelonomi mo bathong ba, o ba kgatlha, o bua mafoko a a molemo nabo, foo ba tlaa nna batlhanka ba gago ka bosakhutleng.”

8Mme a latlha kgakololo ya bannabagolo e ba e mo gakolotseng, a gakololana le batho ba makau ba ba goletseng gongwe nae, ba ba emang fa pele ga gagwe.

9A ba raya a re: “Lona lo ntsha kgakololo efe, gore re tle re bosetse batho ba phetolo, ba ba buileng le nna ba re: ‘Tlhofofatsa jokwe e rraago o ne a e baya mo go rona, gore e nne motlhofo?’ ”

10Batho ba makau ba ba goletseng gongwe nae ba re: “O tlaa raya batho ba ba buileng nao, ba re: ‘Rraago o ne a ketefatsa jokwe ya rona, wena o e tlhofofatse mo go rona’; o tlaa ba raya jaana o re: ‘Monwana wa me o mmotlana o tlaa nna mokima bogolo go lotheka lwa ga rre.

11Jaana e re ka rre a ne a lo belesa jokwe e e bokete, nna ke tlaa oketsa jokwe ya lona; rre o ne a lo simega ka dime, nna ke tlaa lo simega ka diphepheng.’ ”

12Jalo Jeroboame le batho botlhe ba tla kwa go Rehoboame ka letsatsi la boraro, fela jaaka kgosi e ne e laotse ya re: “Lo tle kwa go nna gape ka letsasi la boraro.”

13Kgosi ya ba fetola ka kgobololo; kgosi Rehoboame a latlha kgakololo ya bannabagolo.

14A bua nabo jaaka kgakololo ya batho ba makau, a re: “Rre o ne a ketefatsa jokwe ya lona, nna ke tlaa e oketsa; rre o na a lo simega ka dime, mme nna ke tlaa lo simega ka diphepheng.”

15Kgosi ga e a ka ya reetsa batho; gonne go dirafaditswe ke Modimo, gore Jehofa a tlhomamise lefoko la gagwe le o ne a le bua le Jeroboame morwa Nabate ka Ahija, wa Mošilone.

16 E rile Baiseraele botlhe ba bona fa kgosi e sa ba reetse, batho ba fetola kgosi ba re: “Re na le kabelo efe mo go Dafite? Le gone ga re na boswa bope mo go morwa Jese. Yang megopeng ya lona Baiseraele lotlhe; o bone ntlo ya gago, wena Dafite.” Mme Baiseraele botlhe ba tloga ba ya megopeng ya bone.

17Ka ga bana ba Iseraele ba ba agileng mo metseng ya Juta, Rehoboame a ba busa fela.

18Foo kgosi Rehoboame a roma Hatorame, yo e leng molaodi wa ba ba kgethilweng; mme bana ba Iseraele ba mo kgobotletsa ka maje, a swa. Kgosi Rehoboame a itlhaganela a palama mo kareng ya gagwe, go tla a tshabela kwa Jerusalema.

19Mme Baiseraele ba sa le ba tsuololela kgotla ya ga Dafite, nako ke eno.