PESALEMA 132 - SetswanaTswana 1908/1992（TSW08NO）

Thapelo ya tshegofatso ya Felo ga BoitshepoSefela sa Ditlhatlogo.

1Jehofa, o gopolele Dafite

patiko yotlhe ya gagwe;

2jaaka a ne a ikanela Jehofa,

a ikanela Mothata wa ga Jakobe,

a re:

3“Ruri ga nketla ke tsena

mo mogopeng wa ntlo ya me,

le fa e le go ya mo bolaong jwa me;

4ga nketla ke naya matlho a me

boroko,

le fa e le dintshi tsa me go bokalala;

5go bo go tsamaye

ke bonele Jehofa bonno,

ke bonele Mothata wa ga Jakobe

motlaagana.”

6 Bonang, re go utlwaletse kwa

Eferatha;

ra go fitlhela kwa nageng ya Jaare.

7“Re tlaa tsena

mo metlaaganeng ya gagwe;

re tlaa obama

fa sebeong sa dinao tsa gagwe.

8Jehofa, a ko o tsogele

mo bonnong jwa boikhutso

jwa gago;

wena le letlole la thata ya gago.

9A baperesiti ba gago

ba apesiwe tshiamo;

a baitshepi ba gago

ba duduetse ka boitumelo.”

10Ka ntlha ya ga Dafite

motlhanka wa gago,

o se ka wa hulatsha

sefatlhogo sa motlodiwa wa gago.

11 Jehofa o ikanetse Dafite

ka boammaaruri;

ga a ketla a bo tlhanogela a re:

“Ke tlaa nnisa loungo lwa mmele

wa gago

mo setulong sa gago sa bogosi.

12E tlaa re fa bana ba gago

ba boloka kgolagano ya me,

le tshupo ya me

e ke tlaa e ba rutang,

bana ba bone le bone,

ba tlaa nna mo setulong sa gago

sa bogosi ka bosakhutleng.”

13Gonne Jehofa o ikgethetse Sione;

o go eleleditse

go nna boago jwa gagwe. A re:

14“Fa, ke jone bonno jwa boikhutso

jwa me ka bosakhutleng;

fa, ke gone fa ke tlaa nnang gone,

gonne ke go eleditse.

15Ke tlaa segofatsa dijo tsa gagwe

tsa dibolokelo thatathata;

ke tlaa kgorisa

bahumanegi ba gagwe ka dijo.

16Baperesiti ba gagwe le bone,

ke tlaa ba apesa poloko;

baitshepi ba gagwe

ba tlaa duduetsa thata ka boitumelo.

17 Ke tlaa kukuntsha

lonaka lwa ga Dafite gone;

ke baakanyeditse

motlodiwa wa me lobone.

18Baba ba gagwe

ke tlaa ba apesa ditlhong;

mo go ene ka esi,

serwalo sa gagwe sa bogosi

se tlaa galalela.”