1Modimo, pelo ya me e nitame;
ke tlaa opela,
ee, ke tlaa opela dipako,
le ka e e leng kgalalelo ya me.
2Tsogang, saletare le harepe;
nna ka nosi ke tlaa tsoga
ka maphakela a magolo.
3Ke tlaa go ntshetsa malebogo
mo gare ga ditšhaba, Jehofa;
ke tlaa go opelela dipako
mo gare ga merafe.
4Gonne boutlwelobothoko jwa gago
bo le bogolo godimo ga magodimo,
le boammaaruri jwa gago
bo fitlha kwa maaping.
5O nne o golediwe, Modimo,
godimo ga magodimo;
le kgalalelo ya gago
godimo ga lefatshe lotlhe.
6Boloka ka letsogo la gago
le legolo, mme o re arabe,
gore baratwi ba gago ba gololwe.
7Modimo o buile
mo boitshepong jwa one; wa re:
“Ke tlaa kgana ka boitumelo;
ke tlaa kgaoganya Shekeme,
ke ba ke lekalekanya mokgatšha
wa Sukothe.
8Gileate ke ga me;
Manase ke ga me; Eferaime le ene
ke phemelo ya tlhogo ya me;
Juta ke thobane ya me ya bogosi.
9Moabe ke mogopo wa me
o o tlhapelang; setlhako sa me
ke tlaa se latlhela mo Etome;
ke tlaa kgana ka Filisitia.”
10Ya bo e le mang yo o tlaa nkisang
mo motseng o o thekeleditsweng?
Ya bo e le mang
yo o nkgogetseng mo Etome?
11A ga o a re latlha Modimo?
Mme o sa bolole le dintwa tsa rona,
Modimo.
12Re tlhabantshe le moganetsi,
ka gobo thuso ya motho
ke lefela fela.
13Re tlaa dira ka bonatla ka Modimo,
gonne ke one
o tlaa gatakang baganetsi ba rona.
Who We AreWhat We EelieveWhat We Do
2025 by iamachristian.org,Inc All rights reserved.
