1Sekega tsebe ya gago, Jehofa,
mme o nkarabe,
gonne ke humanegile, ke a tlhoka.
2Dibela mowa wa me,
gonne ke moetsa Modimo;
wena Modimo wa me,
boloka motlhanka wa gago
yo o go ikantseng.
3Nkutlwela botlhoko Morena,
gonne ke tlhola ke biletsa
kwa go wena letsatsi lotlhe fela.
4Itumedise mowa wa motlhanka
wa gago;
gonne ke tsholeletsa mowa wa me
koo go wena Morena.
5Gonne wena, Morena, o molemo,
o iketleeditse go itshwarela; o bile
o letlotlo la boutlwelobotlhoko
mo go botlhe ba ba go bitsang.
6Jehofa, beela morapelo wa me tsebe;
o bo o reetse
lentswe la mekokotlelo ya me.
7Ke tlaa re mo letsatsing
la tlalelo ya me ke go bitse,
gonne o tlaa nkaraba.
8Morena, ga go na ope
yo o tshwanang nao mo medimong,
le gone ga go na ditiro dipe
tse di tshwanang le ditiro tsa gago.
9 Merafe yotlhe e o e dirileng
e tlaa tla e obama fa pele ga gago;
e tlaa galaletsa leina la gago;
10gonne o mogolo,
mme o dira
ditiro tse di gakgamatsang;
o Modimo o o osi.
11Nthuta tsela ya gago, Jehofa;
ke tlaa tsamaya
mo boammaaruring jwa gago;
kitlanya pelo ya me
e tle e boife leina la gago.
12Ke tlaa go baka
Morena Modimo wa me,
ka pelo ya me yotlhe fela;
ke tla galaletsa leina la gago
ka bosenabokhutlo.
13Gonne boutlwelobotlhoko jwa gago
bo bogolo kwa go nna;
mme o swatotse mowa wa me
mo moleteng o o kwa tengteng.
14Modimo, bapelompe
ba ntsogologetse;
le phuthego
ya banna ba ba thubakang
e tsomile mowa wa me;
ga ba a go baya fa pele ga bone.
15Mme wena Morena,
o Modimo,
o o tletseng pelotlhomogi,
o pelotshweu, o bonya go galefa,
o letlotlo la boutlwelobotlhoko
le boammaaruri.
16A ko o sokologele kwa go nna,
o nkutlwele botlhoko;
thata ya gago
o e neye motlhanka wa gago,
mme o boloke morwa lelata la gago.
17Mpontsha sesupo se se kayang
molemo,
gore ba ba nkilang ba se bone,
ba tlhajwe ke ditlhong,
gonne wena, Jehofa,
o nthusitse, o bile o nkgomoditse.
Who We AreWhat We EelieveWhat We Do
2025 by iamachristian.org,Inc All rights reserved.
