1Re go ntshetsa malebogo
Modimo; re a leboga,
gonne leina la gago le le gaufi;
batho ba bolela ditiro tsa gago
tse di gakgamatsang.
2Ke tlaa re ke bona
lobaka lo lo tlhomilweng,
ke atlhole ka thokgamo.
3Lefatshe le tlhapologile
le banni botlhe ba lone;
ke emisitse maotwana a lone. Sela.
4Ke reile baikokomatsi ka re:
“Se direng ka boikokomatso;”
le baikepi ka re:
“Se tsholetseng lonaka.
5Se tsholeletseng lonaka lwa lona
kwa godimo;
se bueng ka thamo
e e tlhamaletseng.”
6Gonne go tsholetsega
ga go tswe kwa botlhabatsatsi
le fa e le kwa bophirimatsatsi,
le fa e le kwa borwa.
7Moatlhodi ke Modimo;
o isa mongwe tlase,
mme o tsholetse yo mongwe.
8Gonne mo seatleng sa ga Jehofa
go na le phafana, mme
bojalwa jwa mofine bo a huhula;
e tletse mo go tlhakantsweng;
mme o tshela ga yone eo;
ruri magorogoro a yone
baikepi botlhe ba lefatshe
ba tlaa a gopisa ba a nwa.
9Mme nna ke tlaa nna ke bolela
ka bosakhutleng;
ke tlaa nna ke opelela
Modimo wa ga Jakobe dipako.
10Dinaka tsotlhe tsa baikepi le tsone
ke tlaa di kgaola;
mme dinaka tsa basiami
di tlaa tsholediwa.
Who We AreWhat We EelieveWhat We Do
2025 by iamachristian.org,Inc All rights reserved.
