PESALEMA 60 - SetswanaTswana 1908/1992（TSW08NO）

Thapelo ya go gololwa mo babeng(Pes 108:6-13)Mikitame wa ga Dafite, wa go ruta; ya jale fa a lwa le Arama-naharaima le Aramasoba, mme Joabe a boya, a gaila ba Etome, ba le dikete tse some le metso mebedi mo Mokokong wa Letswai. Pina ya moopedi yo mogolo; e laeletswe Shušana Edutha.

1Modimo, o re latlhile,

o re thubakile;

o ntse o le bogale;

a ko o bo o re rudise gape.

2O reketlisitse lefatshe;

o le fatogantse;

fodisa diphatogano tsa lone,

ka le a roroma.

3O supeditse batho ba gago

dilo tse di thata;

o re nositse bojalwa jwa mofine

jwa go theekedisa.

4Ba ba go boifang,

o ba neile mokgele,

gore o bonadiwe ka ntlha ya

boammaaruri. Sela.

5Boloka ka seatla sa gago se segolo,

mme o re arabe,

gore moratwi wa gago a gololwe.

6Modimo o buile

mo boitshepong jwa one;

“Ke tlaa ja koma;

ke tlaa kgaoganya Shekeme,

ke tlaa lekalekanya molapo

wa Sukothe.

7Gileate ke ga me,

le Manase ke ga me,

Eferaime le gone

ke phemelo ya tlhogo ya me;

Juta ke thobane ya me ya bogosi.

8Moabe ke mogopo wa me

o o tlhapelang; setlhako sa me

ke tlaa se latlhela mo Etome;

wena Filisitia,

goa ka ntlha ya me.”

9E mang yo o tlaa nkisang

mo motseng o o thata?

E mang

yo o tlaa nkgogelang mo Etome?

10Wena, Modimo, a ga o a re latlha?

Mme le gone Modimo,

ga o ko o bolola le dintwa tsa rona.

11Re nee thuso

go tlhabana le mmaba,

gonne go thusa ga motho ke lefela.

12Re tlaa dira senna ka Modimo,

ka e le one

o o tlaa gatakang baba ba rona.