JEREMIA 48 - SetswanaTswana 1908/1992（TSW08NO）

Go senngwa ga Moabe

1 Ka ga Moabe. Jehofa wa masomosomo, Modimo wa Iseraele o bua jaana, a re:

“A bo go latlhega Nebo!

Gonne o kgakgabaditswe;

Kiriathaime o tlhabisitswe ditlhong,

o gapilwe; kago ya phemela

e tlhabisitswe ditlhong,

mme e rutlologile.

2Pako ya Moabe

ga e tlhole e le gone;

ba mo logetse maano a a bosula

mo Hešebone, ba re:

‘Ntlong, re mo khutliseng

mo go tlholeng a le morafe.’

Le wena, Matemene,

o tlaa tuuladiwa,

tšhaka e tlaa go konatelela.

3A modumo wa go goa

mo go tswang Horonaime:

‘Go thopa le go senya mo go golo!’

4Moabe o sentswe;

banyana ba gagwe

ba utlwaditse go goa.

5Gonne ba tlaa tlhatloga

ka fa botlhatlogong jwa Luhithe

ka selelo se se sa khutleng;

gonne mo bofologong jwa

Horonaime ba utlwile tlalelo

ya go goa ga tshenyego.

6Tshabang, ipolokeng,

mme lo nne jaaka

logolo mo nageng.

7Gonne, e re ka o ikantse

mo ditirong tsa gago

le mo mahumong a gago,

le wena o tlaa thopiwa;

le Kemoše o tlaa tswa

a ya botshwarong,

baperesiti ba gagwe

le dikgosana tsa gagwe mmogo.

8Mothopi o tlaa tla

mo motseng mongwe le mongwe,

mme ga go motse ope

o o tlaa falolang;

le molapo o tlaa šwa,

le lobala lo tlaa senngwa;

jaaka Jehofa a buile.

9Nayang Moabe diphuka,

gore a fofe a ye koo;

mme metse ya gagwe

e tlaa nna tshwafalo,

e sena ope yo o nnang gone.

10“A go hutsege ene

yo o dirang tiro ya ga Jehofa

a itshemeleditse,

mme a go hutsege ene

yo o kganelelang madi

tšhaka ya gagwe.”

Metse ya Moabe e tlaa senngwa

11“Moabe o sa le a iketla

ka bokau jwa gagwe,

o sa le a itsheka

mo dintshing tsa gagwe,

ga a ka a tlhotlhwa

a tswa nkgwaneng

a ya nkgwaneng;

ga a ka a ya botshwarong;

ke gone ka moo moutlwalo

wa gagwe o setse mo go ene,

le monko wa gagwe

ga o a fetoga.

12“Ke gone bonang metlha e etla,”

go bua Jehofa,

“e ke tlaa romang kwa go ene

bone ba ba tlhotlhang,

mme ba tlaa mo tlhotlha;

ba tlaa tsholola

se se mo dijaneng tsa gagwe,

mme ba tlaa thuba

dinkgwana tsa gagwe.

13Moabe o tlaa tlhabisiwa ditlhong

ke Kemoše,

jaaka ba ntlo ya Iseraele

ba ne ba tlhabisiwa ditlhong

ke Bethele boikanyo jwa bone.

14“Lo bua jang, lo re:

‘Re banna ba ba thata,

re diganka tsa go dira ntwa’?

15Moabe o kgakgabaditswe,

ba tlhatlogetse mo metseng

ya gagwe, mme makau a gagwe

a a tlhophegileng

a fologetse polaong,”

go bua Kgosi, e leina la yone

e leng Jehofa wa masomosomo.

16“Tatlhego ya ga Moabe e atametse,

le pitlagano ya gagwe

e itlhaganela ka thata.

17Lona lotlhe

ba lo mo tikologong ya gagwe,

lo mo thukhuthele tlhogo,

le lona lotlhe ba lo mo itseng leina,

lo re:

‘Ana lore lwa bogosi lo lo thata

lo robegile jang, tsamma e ntle.’

18“Wena ngwana wa mosetsana

yo o agileng mo Dibone,

fologa mo kgalalelong ya gago,

mme o dulele mo lenyoreng;

gonne mothopi wa Moabe

o go bololetse,

o sentse dikago tsa gago

tse di thata tsa phemelo.

19Wena monni wa Aroere,

ema fa tseleng o tlhodumele;

botsa monna yo o tshabang,

le mosadi yo o falolang;

o re: ‘Go dirafetseng?’

20Moabe o tlhabisitswe ditlhong;

gonne o rutlolotswe;

bokolelang lo goe;

lo go bolele mo Arenone,

lo re: Moabe o kgakgabaditswe.

21“Tshekiso e tsile

mo lefatsheng la lobala;

mo Holone, le mo Jahesa

le mo Mefaathe;

22le mo Dibone, le mo Nebo,

le mo Bethe-dibalathaime;

23le mo Kiriathaime,

le mo Bethe-gamule,

le mo Bethemeone;

24le mo Keriothe, le mo Bosera,

le mo metseng yotlhe

ya lefatshe la Moabe,

e e kwa kgakala le e e fa gaufi.

25Lonaka lwa ga Moabe lo kgaotswe,

le letsogo la gagwe le robilwe,”

go bua Jehofa.

Moabe o tlaa ngotlafadiwa

26“Mo tagiseng; gonne o na a ikgodisetsa Jehofa; Moabe o tlaa bidikama mo matlhatseng a gagwe, mme le ene o tlaa bolaisa ditshego.

27Ka gonne a Iseraele o ne a sa go bolaise ditshego? A o ne a fitlhelwa mo magodung? Gonne ya tle e re o bua ka ga gagwe, wa bo o tle o nne o tshikinye tlhogo.

28“Lona banni ba Moabe, tlogelang metse, lo ye go nna mo lefikeng; lo nne jaaka letseba le le agang setlhaga sa lone mo ditlhakoreng tsa molomo wa logaga.

29Re utlwile ka ga boikgodiso jwa ga Moabe, go re, o boikgodiso thata; boitlotlomatso jwa gagwe, le bodipa jwa gagwe, le bopelompe jwa gagwe.

30Ke a e itse tšhakgalo ya gagwe, go bua Jehofa, go re, ga se sepe; go ipelafatsa ga gagwe ga go ise go dire sepe.

31Ke gone ka moo ke tlaa bokolelelang Moabe; ee, ke tlaa goa ka ga ba Moabe botlhe; ba tlaa hutsafalela banna ba Kireherese.

32Ke tlaa go lelela ka selelo se se fetang sa ga Jasere, wena mofine wa Sibema; menamo ya gago e ne ya kgabaganya lewatle, ya fitlha fela kwa lewatleng la Jasere; mothopi o wetse maungo a gago a letlhabula, le mo difineng tsa gago.

33Boipelo bo tlositswe le boitumelo mo masimong a a ungwang le mo lefatsheng la Moabe; mme ke khutlisitse bojalwa jwa mofine mo dikgatisetsong; ga go na ope yo o tlaa gatang ka tuduetso; tuduetso e tlaa bo e se tuduetso ya sepe.

34“Go tswa kgoong ya Hešebone go ya fela kwa Eleale, le go ya fela kwa Jahase, ba tumisitse kodu ya bone, go tswa Soare go ya fela kwa Horonaime, kwa Egelathe-šelešiya; gonne le metsi a Nimerime le one a tlaa swafala fela.

35Gape ke tlaa khutlisa mo Moabe ene yo o isang tshupelo mo felong fa go tlotlometseng, le ene yo o fisetsang medimo ya gagwe maswalo, go bua Jehofa.

36“Ke gone ka moo pelo ya me e dumang ka ga Moabe jaaka ditlhaka, pelo ya me e duma jaaka ditlhaka ka ga batho ba Kireherese; ke gone ka moo letlotlo le o le bonyeng le nyeletse.

37Gonne tlhogo nngwe le nngwe e logatadima, le ditedu tsotlhe di kgaotswe; mo diatleng tsotlhe go na le ditshegako, le mo dithekeng go letsela la kgetse.

38Mo godimo ga mantlo otlhe a Moabe le mo mebileng ya gone go na le modumo wa khutsafalo ka ntlha tsotlhe fela; gonne ke thubile Moabe jaaka sejana se go senang kgatlhego epe mo go sone,” go bua Jehofa.

39“Ana o rutlologile jang? Ba bokolela jang! Moabe o hularetse batho jang ka ditlhong! Jalo Moabe o tlaa nna setshego le seboifiso mo go botlhe ba ba mo tikologong ya gagwe.”

Moabe ga a ka ke a falola

40Gonne Jehofa o bua jaana, a re: “Bonang, o tlaa fofa jaaka ntswi yo motona, o tlaa tsharololela Moabe diphuka ka bosula.

41Keriothe o gapilwe, mme dikago tse di thata tsa phemelo di tshoganetswe, le pelo ya diganka tsa Moabe ka motlha oo e tlaa nna jaaka pelo ya mosadi mo metlotseding ya gagwe.

42Moabe o tlaa senngwa gore e se tlhole e le sešaba, ka a ikgodiseditse Jehofa.

43Poifo, le molete, le seru, di mo go wena, wena monni wa Moabe,” go bua Jehofa.

44“Yo o tshabang ka poifo o tlaa wela mo moleteng; mme yo o tsogang a tswa mo moleteng o tlaa tshwarwa mo serung; gonne ke tlaa lere mo go ene, e bong mo go Moabe, ngwaga wa tshekiso ya bone,” go bua Jehofa.

45“Ba ba tshabileng ba eme ba sena thata mo moriting wa Hešebone; gonne go dule molelo mo Hešebone, le kgabo mo gare ga Sihone, mme di laitse ntlha ya Moabe, le diphugo tsa ba ba feretlhang.

46A bo go latlhega wena Moabe! Batho ba Kemoše ba latlhegile, gonne bana ba gago ba basimane ba tlositswe ba golegilwe, le bana ba gago ba basetsana ba ile botshwarong.

47“Le fa go ntse jalo ke tlaa ba ke busa botshwaro jwa ga Moabe mo metlheng ya bofelo,” go bua Jehofa. Tshekiso ya Moabe e kalo.