MORERI 10 - SetswanaTswana 1908/1992（TSW08NO）

1Dintshi tse di suleng

di nkgisa setlolo

sa modira dinkgisa monate sebodu;

boeleele bo le bonnye bo feta jalo

botlhale le tlotlo ka bokete

mo selekanyong.

2Pelo ya motho yo o botlhale

e ka fa ntlheng ya letsogo le legolo;

mme pelo ya seeleele

e ka fa ntlheng ya la molema.

3Ee, le gone fa seeleele se tsamaya

mo tseleng,

tlhaloganyo ya sone e se tlhaele,

mme se ipolele mongwe le mongwe,

se re: “Ke seeleele.”

4Fa mowa wa molaodi o go

tsogologela,

o se ka wa tlogela felo ga gago;

gonne boineelo bo ngotla ditlolo tse

dikgolo.

5Go na le bosula bongwe jo ke bo bonyeng tlase ga letsatsi, e kete ke timelo e e tswang mo molaoding.

6Boeleele bo bewa mo tlotlong e kgolo, mme bahumi ba dule mo felong fa go kwa tlase.

7Ke bonye batlhanka ba palame dipitse, le dikgosana di tsamaya fa fatshe jaaka batlhanka.

8 Yo o epang lemena

o tlaa wela mo go lone;

mme yo o sutlhang ka logora

noga e tlaa mo loma.

9Yo o sutisang maje

o tlaa utlwisiwa botlhoko ke one;

le yo o rathang dikgong

o mo poitshegong ka gone.

10Fa tshipi e le boboi, mme motho

a sa lootse bogale jwa yone,

foo o na le go ikitlimanya bogolo;

mme botlhale bo molemo

go siamisa.

11Fa noga e loma e ise e tseanngwe,

foo ga go na thuso

mo motseanying.

12Mafoko a molomo wa motho yo o

botlhale a mantle;

mme dipounama tsa seeleele

di tlaa metsa sone seeleele ka sosi.

13Tshimologo ya mafoko a molomo

wa sone ke boeleele,

le bokhutlo jwa puo ya sone

ke botsenwa jo bo bosula.

14Gape seeleele se tle se ntsifatse

mafoko;

le fa go ntse jalo motho ga a itse

se se tlaa nnang;

mme se se tlaa nnang

morago ga gagwe

e mang yo o ka se mmolelelang?

15Letsapa la dieleele

le lapisa sengwe le sengwe sa tsone,

ka se sa itse ka fa se ka yang

motseng ka gone.

16O a bo o latlhega, wena lefatshe

fa kgosi ya gago e le ngwanyana

le dikgosana tsa gago

fa di ja go sa le ka moso.

17O sego wena lefatshe,

motlhang kgosi ya gago

e leng ngwana wa batho ba batona,

le dikgosana tsa gago

fa di ja ka motlha o o siameng,

gore ba nne thata,

e seng gore ba tagwe.

18Ditlhomeso di wela mo teng

ka bomatla jwa motho;

ntlo e be e dutle ka bobodu

jwa diatla.

19Modiro o direlwa ditshego,

le bojalwa jwa mofine bo itumedisa

botshelo;

le madi a fenya dilo tsotlhe.

20O se ka wa roga kgosi,

nnyaa, le fa e le mo mogopolong;

le bahumi o se ka wa ba roga

mo ntlwaneng ya gago ya borobalo;

gonne nonyane ya loapi

e tlaa isa lentswe,

le se se nang le diphuka

se tlaa bolela mafoko.