ISAIA 3 - SetswanaTswana 1908/1992（TSW08NO）

Boithatelo jwa batho ba Jerusalema

1Gonne, bonang, Morena, Jehofa wa masomosomo, o tlosetsa Jerusalema le Juta seitshegetso le thobane, seitshegetso sotlhe sa dijo, le seitshegetso sotlhe sa metsi;

2monna wa seganka, le monna wa seemana; moatlhodi, le moperofeti, le moitseanape le mogologolo;

3molaodi wa ba ba masome matlhano, le motlotlegi, le mogakolodi, le motho yo o dirang ka maano a botlhale, le yo o tseanyang ka botswerere.

4Ke tlaa baya banyana go nna dikgosana tsa bone, le masea a tlaa ba busa.

5Mme batho ba tlaa patikwa mongwe le mongwe ke o sele, le mongwe le mongwe ke mongwe ka ene; ngwanyana o tlaa nna logwadi mo go yo mogologolo, le yo o mmenyana mo go yo o tlotlegang.

6Motlhang o motho o tshwarang morwa rraagwe wa ntlo ya ga rraagwe, a re: “O na le diaparo, o nne molaodi wa rona; mme a tshenyego e, e nne mo seatleng sa gago.”

7Mo letsatsing leo o tlaa tsholetsa lentswe la gagwe, a re: “Ga nketla ke nna mofodisi; gonne mo ntlong ya me ga go na dijo, ga go na diaparo; ke gana lo ntira molaodi wa batho.”

8Gonne Jerusalema o rutlologile, le Juta o ole, gonne loleme lwa bone, le go dira ga bone ke go tlhabana le Jehofa, go gakatsa matlho a kgalalelo ya gagwe.

9Ponalo ya difatlhogo tsa bone e supa ka ga bone, mme ba kakanya boleo jwa bone, jaaka Sotoma, ga ba bo lobe. Ija, a bo go latlhega mowa wa bone! Gonne ba ituetse ka bosula.

10Buang ka ga mosiami, lo re: Go tlaa nna sentle mo go ene, gonne ba tlaa ja loungo lwa go diradira ga bone.

11Ija, a bo go latlhega moikepi! Go tlaa nna maswe mo go ene, gonne tuelo ya diatla tsa gagwe o tlaa e newa.

12Ka ga batho ba me, banyana ke bapatiki ba bone, basadi ba a ba busa. Ao batho ba me! Bone ba ba lo gogang ba a lo timetsa, ba faratlhatlhanya motlhala o o fa ditsela tsa lona di tsamayang gone.

Katlholo ya ga Jehofa mo bathong ba one

13Jehofa o emela go ganelela, o emela go atlhola ditšhaba.

14Jehofa o tlaa tsena mo tshekong le bagolwane ba tšhaba ya gagwe, le dikgosana tsa yone: “Ke lona ba lo jeleng lwa lakaila tshimo ya mafine; tse lo di thopileng tsa bahumanegi di mo matlong a lona.

15Lo a bo lo reng, fa e bo ne ne lo fitlhegetse batho ba me jaana, lo sila sefatlhogo sa bahumanegi?” Go bua Morena, Jehofa wa masomosomo.

Tlhagiso mo basading ba Jerusalema

16Gape Jehofa a re: “E re ka bomorwadia Sione ba le bopelompe, ba tsamaya ka go kenelatsa dithamo, le ka matlho a a fanyafanyang, ba e tla ba ngobota, ba tlhasinyega ka dinao,

17ke gone ka moo Jehofa o tlaa betsa diphogo tsa bomorwadia Sione ka dipanang, Jehofa o tlaa ba bipololela ditlhong tsa bone.”

18E tlaa re mo letsatsing leo Morena o tlaa tlosa mekgabokgabo ya ditilwane, le metlonya, le mekgabo ya sekangwedi;

19le manyenana a ditsebe, le mefitshana, le masirenyana a tlhogo;

20le dipuane tsa tlhogo, le dikagale, le meitlamo, le dikurwana tsa malao, le dipheko;

21mekgabo ya dipalamenwana, le ya manyena a dinko;

22diaparo tsa mediro, le mesari, le dikobo, le merabana;

23le diipone tsa diatla, le leloba le le boleta, le dithatelelo tlhogo, le disiro tse dikgolo.

24Go tlaa dirala, go re, mo boemong jwa malao a a monko o monate go tlaa nna tšheretlhegano; le mo boemong jwa moitlamo kgole; le mo boemong jwa loetse logatadima; le mo boemong jwa mokgabo wa mpa letsela la kgetse; pabolo ya phiso boemong jwa bontle.

25Bana ba gago ba tlaa wa ka tšhaka, le diganka tsa gago mo ntweng.

26Dikgoro tsa gagwe di tlaa hutsafala, di lela; mme o tlaa swafala o ritibala fa fatshe.