1Jehofa, a ko o se ka wa
nkgalemela ka bogale jwa gago;
le gone o se ka wa nkwatlhaya
ka bogale jwa gago jo bo tukang.
2Gonne metswi ya gago
e tsepame mo go nna,
seatla sa gago le sone
se nkgateletse mo go botlhoko.
3Ga go na boitekanelo bope mo
nameng ya me
ka ntlha ya kgakalo ya gago;
le gone ga go na go fola gope
mo marapong a me
ka ntlha ya boleo jwa me.
4Gonne ditshiamololo tsa me
di khurumeditse tlhogo ya me,
fela jaaka morwalo o o bokete,
di a nkimela.
5Dikweneso tsa me di a nkga,
di bodile,
ka ntlha ya boeleele jwa me.
6Ke a segega,
ke bile ke hutaganye thata;
ke tlhola ke ntse ke hutsafetse
motshegare otlhe.
7Gonne lotheka lwa me lo tletse
phisego;
ga go na boitekanelo bope
mo nameng ya me.
8Ke a idibala,
ke tapetegile mo go botlhoko;
ke gwetlisitswe ke go tlhoka
go ikhutsa ga pelo ya me.
9Morena, keletso ya me yotlhe
e fa pele ga gago;
le go duma ga me
ga go a go fitlhegela.
10Pelo ya me e a tlolatlola,
thata ya me e a mphelela;
ka ga lesedi la matlho a me,
le lone le ntlogetse.
11Barati ba me le ditsala tsa me
ba emetse sebetso sa me fa thoko;
le ba losika lwa me
ba emetse kgakala.
12Le ba ba tsomang botshelo jwa me,
ba mpeela dirai;
le ba ba batlang go nkutlwisa
botlhoko ba bua dilo tsa bosenyi,
ba akanya ditsietso ka letsatsi lotlhe.
13Mme nna, jaaka motho yo o bosusu,
ga ke utlwe;
ke ntse jaaka motho yo o semumu,
yo o sa tsweng molomo.
14Ee, ke ntse jaaka motho yo o sa
utlweng le yo go se nang dikgalemo
mo molomong wa gagwe.
15Gonne ke solofetse mo go wena,
Jehofa; o tlaa araba,
Morena, Modimo wa me.
16Gonne ke rile:
“Ba ka tla ba itumela ka nna;
ya re lonao lwa me lo relela,
ba inkgodisetsa.”
17Gonne ke a kwetsepela,
le bohutsana jwa me
bo fa pele ga me ka gale.
18Gonne ke tlaa bolela boikepo
jwa me;
ke tlaa hutsafalela boleo jwa me.
19Baba ba me bone, ba tlhaga,
ba thata; le ba ba nkilang
ka go sa siamang ba ntsifetse;
20le ba ba lefelang molemo ka bosula
ke baganetsi ba me, ka gobo
ke latelela selo se se molemo.
21A ko o se ka wa ntlogela, Jehofa;
Modimo,
a ko o se nne kgakala le nna.
22A ko o itlhaganelele go nthusa
Morena, poloka ya me.
Who We AreWhat We EelieveWhat We Do
2025 by iamachristian.org,Inc All rights reserved.
