ESETHERE 5 - SetswanaTswana 1908/1992（TSW08NO）

Esethere o laletsa kgosi le Hamane

1Jaana ga dirala ya re ka letsatsi la boraro, Esethere a apara diaparo tsa gagwe tsa segosi, a ya a ema mo lwapeng lo lo kwa teng lwa ntlo ya kgosi, bolebagana le ntlo ya kgosi; mme kgosi ya bo e dutse mo setulong sa yone sa segosi mo ntlong ya segosi, bolebagana le kgoro ya ntlo.

2Ga dirala e rile kgosi e bona Esethere mohumagadi a eme mo lwapeng, Esethere a bona botsalano mo ponong ya yone; mme kgosi ya otlololela Esethere thobane ya gouta ya bogosi e o e tshotseng. Mme Esethere a atamela, a ama ntlha ya thobane ya bogosi.

3Foo kgosi ya mo raya ya re: “O ratang mohumagadi Esethere? Topo ya gago ke eng? O tlaa se newa fela le fa e ka bo e le bontlhanngwe jwa bogosi.”

4Esethere a re: “Fa go le molemo mo kgosing, a kgosi e tle le Hamane gompieno mo modirong o ke o e baakanyeditseng.”

5Foo kgosi ya re: “Itlhaganediseng Hamane, gore go dirwe jaaka Esethere a buile.” Jalo kgosi le Hamane ba tla modirong o Esethere o ne a o baakantse.

6Kgosi ya raya Esethere mo modirong wa bojalwa jwa mofine ya re: “Thapelo ya gago ke eng? O tlaa e newa; topo ya gago ke eng? Le fa e ka bo e le bontlhanngwe jwa bogosi go tlaa dirafadiwa.”

7Foo ga fetola Esethere, a re: “Thapelo le topo ya me ke e:

8Fa ke bonye botsalano mo matlhong a kgosi, fa go kgatlha kgosi go nnaya thapelo ya me, le go dirafatsa topo ya me, a kgosi le Hamane ba tle modirong o ke tlaa o ba baakanyetsang, mme ke tlaa dira ka moso jaaka kgosi e buile.”

Hamane o loga maano a go bolaya Moretekai

9Foo Hamane a tswa ka tsatsi leo a itumetse, a le pelo e e ipelang. Mme ya re Hamane a bona Moretekai mo kgorong ya kgosi, a se ka a ema ka dinao le fa e le go tsikinyega ka ga gagwe, a tlalela Moretekai bogale.

10Le fa go ntse jalo a ithiba, mme a ya gae; a roma a ya go bitsa ditsala tsa gagwe le Sereše mosadi wa gagwe.

11Hamane a ba kakanyetsa kgalalelo ya dikhumo tsa gagwe le bontsi jwa bana ba gagwe, le dilo tsotlhe tse kgosi e mmeileng kwa pele mo go tsone, le jaaka e mmeile kwa pele ga magosana le batlhanka ba kgosi.

12Gape Hamane a re: “Ee, Esethere mohumagadi wa kgosi ga a ka a leseletsa monna ope go tsena le kgosi mo modirong o o ne a o baakantse fa e se nna; le ka moso ke laleditswe ke ene go ya mmogo le kgosi.

13Le fa go ntse jalo golo mo, ga go nthuse sepe fa ke sa ntse ke bona Moretekai wa Mojuta a dutse mo kgorong ya kgosi.”

14Foo ga bua Sereše mosadi wa gagwe le ditsala tsa gagwe tsotlhe nae, ba re: “A go baakanngwe sefata sa polaelo se se bogodimo jwa dimetara di le 22, mme e re ka moso o bue le kgosi gore Moretekai a pegwe mo go sone; foo o tlaa itse go tsena le kgosi mo modirong ka pelo e e ipelang.” Selo seo sa kgatlha Hamane, mme a laola gore sefata sa polaelo seo se baakanngwe.