JOBE 40 - SetswanaTswana 1908/1992（TSW08NO）

1Gape Jehofa a fetola Jobe a re:

2“Yo o betogang fela

a o tlaa ganela le Mothatayotlhe?

Yo o ganetsanyang le Modimo,

a a go fetole.”

3Foo Jobe a fetola Jehofa a re:

4“Bona, ga ke sepe;

ke tlaa go fetola ke reng?

Ke ipaya seatla mo molomong fela.

5Ke buile gangwe fela,

mme ga nketla ke fetola;

ee, gabedi,

mme ga nketla ke tlhola

ke tswelela.”

6Foo Jehofa a le mo sefefong a fetola

Jobe a re:

7“A ko o ikokwaele lotheka

jaana jaaka monna,

ke tlaa go botsa,

mme o nkakanyetse.

8A o tlaa tsupuetsa le e leng katlholo

ya me?

A o tlaa mpona molato

gore o tle o siamisiwe?

9Kgotsa a o na le letsogo

le le tshwanang jaaka la Modimo?

A o ka duma ka lentswe jaaka one?

10A ko o ikgabise ka tlotlomalo

le bogolwane,

mme o ikapese ka tlotlo le borena.

11Thela mapenologo a bogale jwa

gago, o lebe mongwe le mongwe

yo o ikgodisang o mo kokobetse.

12Leba mongwe le mongwe

yo o ikgodisang,

mme o mo ise kwa tlase;

o gatakele baikepi fa ba emeng gone.

13Ba fitlhe mmogo mo loroleng;

o bofele difatlhogo tsa bone

mo felong fa go fitlhegileng.

14Foo le nna ke tlaa go ipolela,

gore seatla se segolo sa gago

tota se ka go boloka.

15A ko o bone kubu,

e ke e dirileng jaaka le wena

ke go dirile;

e ja bojang jaaka kgomo.

16A ko o bone, thata ya yone

e mo lothekeng lwa yone,

nonofo ya yone

e mo mesifeng ya mpa ya yone.

17E tle e tsokotse mogatla

jaaka setlhare sa mosetara;

mesifa ya dirope tsa yone

e nganaganye.

18Marapo a yone

a ntse jaaka mephakalego

ya kgotlho;

dikgopo tsa yone di tshwana

jaaka mephakalego ya tshipi.

19Ke yone e kgolo mo ditirong

tsa Modimo;

ene yo o e dirileng ke ene esi

yo o ka atametsang tšhaka ya gagwe

kwa go yone.

20Ruri dithaba di e medisetsa dijo;

kwa diphologolo tsotlhe tsa naga

di tshamekelang gone.

21E tle e bothe fa tlase ga koma,

mo boiphitlhelong jwa lotlhaka,

le mo ditsobotleng.

22Koma ya e sira ka moriti wa yone;

madubunoka a molatswana

a e dikanyetse.

23Bona, le fa noka e penologa,

ga e rorome;

e boikanyo fela

le fa Joretane a gogomogela

le kwa molomong wa yone.

24A mongwe o ka e tshwara e lebile,

kgotsa a mongwe o ka phunya nko

ya yone ka serai?”