1 Ntheetsang, lona ditlhake;
lo reetse, lona ditšhaba
lo le kgakala;
Jehofa o mpiditse
ke sa le ke tswa sebopelong;
ke sa le ke tswa mo maleng a ga mme
o ntse a umaka leina la me.
2 O dirile molomo wa me
go nna jaaka tšhaka e e bogale;
o mphitlhile mo moriting
wa seatla sa gagwe;
o ntirile motswi o o gotlhegileng,
o mpolokile thata mo mokotlopong
wa gagwe.
3A nthaya a re: “O motlhanka
wa me; o Iseraele,
yo ke tlaa galalediwang mo go wena.”
4Mme nna ka re: “Ke diretse lefela,
ke feditse thata ya me ka bosengsepe
le ka boithamako fela;
le fa go ntse jalo ruri
go siamisiwa ga me go tlaa bo go le
mo go Jehofa, le tuelo ya me
mo Modimong wa me.”
5Jaana, go bua Jehofa,
yo o mpopetseng
go nna motlhanka wa gagwe
ke sa le ke tswa sebopelong,
go tlaa ke busetsa Jakobe
kwa go ene,
le gore Iseraele a
phuthelwe kwa go ene;
(gonne aitse nna, ke tlotlego mo
matlhong a ga Jehofa,
Modimo wa me o diregile thata ya me).
6 Ee, a re: “Ke selo se se motlhofo
bobe fa o ka nna
motlhanka wa me gosi,
go tsosa ditso tsa ga Jakobe,
le go busa ba ba neng ba bolokilwe
ba Iseraele;
le gone ke tlaa go ntsha
gore o nne lesedi la merafe,
gore o tle o nne poloka ya me
kwa sekhutlong sa lefatshe.”
7Go bua jaana Jehofa,
morekolodi wa Iseraele,
le Moitshepi wa gagwe,
o raya ene yo motho o mo nyatsang,
ene yo o fedisang morafe pelo,
le motlhanka wa balaodi,
a re: “Dikgosi di tlaa bona
di ba di nanoga;
dikgosana di tlaa obama;
ka ntlha ya ga Jehofa
yo o boikanngo,
e bong Moitshepi wa Iseraele
yo o go itshenketseng.”
Jerusalema o agiwa seša8 Go bua jaana Jehofa, a re:
“Ke go arabile mo lobakeng
lo lo lebosegang
le mo letsatsing le e leng la poloko
ke go thusitse;
mme ke tlaa go dibela,
ke go ntsha gore o nne kgolagano
ya batho go rudisa lefatshe,
le go ba jesa maswa a a swafetseng;
9go raya bagolegwi, go re:
‘Tswang;’ go raya ba ba mo lefifing
go re: ‘Iponatseng.’
Ba tlaa fula mo ditseleng,
mme bofulo jwa bone bo tlaa nna
mo dithoteng tse di leforotlho.
10 Ga ba ketla ba bolawa ke tlala,
le fa e le ke lenyora;
le mogote ga o ketla o ba tlhapela
le fa e le letsatsi; gonne ene
yo o ba utlwelang botlhoko
o tlaa ba goga,
le ka fa go e e leng metswedi
ya metsi
o tlaa ba etelela pele.
11“Dithaba tsa me tsotlhe
ke tlaa di dira tsela,
le ditsela tsa me tsa meheru
di tlaa goletsega.
12Bonang, ba, ba tlaa tswa kgakala;
mme bonang ba, ba tlaa tswa
botsheka le kwa bophirimatsatsi;
le ba, ba tlaa tswa lefatsheng la
Sinime.”
13Opelang, lona magodimo;
o ipele wena lefatshe;
ponyegang mo kopelong,
lona dithaba; gonne Jehofa
o gomoditse batho ba gagwe;
mme o tlaa tlhomogela babogisiwa
ba gagwe pelo.
14Sione ene a re: “Jehofa o ntlhadile,
Morena o ntebetse.”
15“A mosadi o ka lebala losea lwa
gagwe lo lo anyang, gore
a tle a se ka a tlhomogela ngwana
wa sebopelo sa gagwe pelo?
Ee, bao ba ka tla ba lebala,
mme wena, le fa go ntse jalo
ga nketla ke go lebala.
16Bona ke go setile ka fa teng
ga diatla tsa me;
dithako tsa gago di ntse
fa pele ga me ka gale le ka gale.
17Bana ba gago ba a akofa;
basenyi ba gago ba ba go
kgakgabaditseng
ba tswa mo go wena.
18Tsholetsa matlho a gago o lebalebe,
o bone; bao, botlhe, ba a phuthega,
ba tla mo go wena.
Jaaka ke tshedile, go bua Jehofa,
o tlaa ikapesa ka bone botlhe
jaaka ka mokgabo,
o ikgoma ka bone
jaaka monyadwi.
19“Gonne, ka ga mafelo a a
kgakgabetseng a gago,
le a a swafetseng,
le lefatshe la gago le le sentsweng,
ruri jaanong,
banni ba tlaa pitlagana bobe,
mme ba ba kileng ba go kometsa
ba tlaa nna kwa kgakala.
20Bana ba tatlhegelo ya gago
ba tlaa nama ba bua mo ditsebeng
tsa gago,
ba re: ‘Ke pitlaganye mo felong fa,
nkatogela, gore ke nne.’
21Foo o tlaa ithaya mo pelong, o re:
‘Ana emang yo o ntsaletseng
bone ba, etswa
ke ne ke latlhegetswe ke bana ba me,
ke le mokojwi, ke le mofaladi,
ke kailakaila fela?
Emang yo o otlileng bone ba?
Bona, ke ne ke tlogetswe ke le nosi;
bone ba, ba ne ba le kae?’ ”
22Go bua jaana Morena Modimo, a re:
“Bonang ke tlaa tsholeletsa merafe
seatla sa me,
ke tlhomela ditšhaba mokgele wa
me, mme ba tlaa tlisa
bomorwao mo difubeng tsa bone,
le bomorwadio ba tlaa sikarwa
mo maruding a bone.
23Dikgosi di tlaa nna borraago
ba ba go otlang,
le bahumagadi ba tsone
bommaago ba ba go otlang;
di tlaa go ikobela di isa
difatlhogo tsa tsone mo mmung,
di latswa lorole lwa dinao tsa gago;
mme o tlaa itse fa ke le Jehofa,
le go re ba ba ntebelelang
ga ba ketla ba tlhajwa
ke ditlhong.”
24A thopo e tlaa tseelwa diganka,
kgotsa ba ba golegilweng ka fa
tshwanong a ba tlaa gololwa?
25Go bua jaana Jehofa, a re:
“Le ba e leng bagolegwi ba diganka
ba tlaa tsewa,
le se se gapilweng ke ba ba
boitshegang se tlaa gololwa;
gonne ke tlaa ganela le ene
yo o ganelang nao,
mme ke tlaa boloka bana ba gago.
26Ba ba go patikang
ke tlaa ba jesa nama ya bone;
ba tlaa tagwa ke madi a bone,
jaaka ka bojalwa jo bo botshe;
mme nama yotlhe e tlaa itse go re
Nna Jehofa ke mmoloki wa gago
le morekolodi wa gago,
Mothata wa ga Jakobe.”
Who We AreWhat We EelieveWhat We Do
2025 by iamachristian.org,Inc All rights reserved.
