ISAIA 61 - SetswanaTswana 1908/1992（TSW08NO）

Mafoko a a molemo a poloka mo go Sione

1 Mowa wa Morena Modimo

o mo go nna;

gonne Jehofa o ntloleditse

go rerela ba ba pelonolo

mafoko a a molemo;

o nthomile gore ke fape

ba ba pelo di phatlogileng,

go bolelela batshwarwa kgololo,

le ba ba golegilweng,

go re ntlo ya kgolegelo e budilwe.

2 Go bolela ngwaga o o lebosegang

wa ga Jehofa,

le letsatsi la pusoloso

ya Modimo wa rona;

go gomotsa botlhe

ba ba hutsafetseng;

3go laolela ba ba hutsafetseng

mo Sione,

go ba naya mokgabo wa ditšheše

boemong jwa melora,

lookwane lwa boitumelo

boemong jwa khutsafalo,

seaparo sa pako

mo boemong jwa mowa

wa ngodiego;

gore ba bidiwe ditlhare tsa tshiamo,

tse di tlhomilweng ke Jehofa,

gore a galalediwe.

4Ba tlaa aga marope a magologolo,

ba tlaa tsosolosa

fa go swafetseng ga pele,

ba tlaa mamatlelela metse

e e kgakgabetseng

marope a ditshika di le dintsi.

5Baeng ba tlaa ema

ba fudisa matsomane a lona,

ba ditšhaba ba tlaa nna

balemedi ba lona

le babaakanyetsi ba

lona ba mafine.

6Lona lo tlaa bidiwa

baperesiti ba ga Jehofa;

batho ba tlaa lo bitsa

badiredi ba Modimo wa rona;

lo tlaa ja mafumo a merafe,

lo tlaa itlotla ka kgalalelo ya yone.

7Mo boemong jwa ditlhong tsa lona

lo tlaa amogela sebedi;

mme mo boemong jwa tsielo

ba tlaa itumela

mo kabelong ya bone;

ke gone ka mo ba tlaa ruang sebedi

mo lefatsheng la bone;

boitumelo jo bo sa khutleng

bo tlaa nna mo go bone.

8Gonne nna Jehofa ke rata tshiamiso,

ke ila bogodu bo na le boikepo;

ke tlaa ba naya maduo a bone

mo boammaaruring,

ke dira kgolagano e e sa khutleng

nabo.

9Losika lwa bone lo tlaa itsiwe

mo merafeng

le matlhogela a bone mo ditšhabeng;

botlhe ba ba ba bonang

ba tlaa ba dumela fa e le bone

losika lo Jehofa o lo segofaditseng.

10 Ke tlaa itumela thata mo go Jehofa,

mowa wa me o tlaa ipela

mo Modimong wa me,

ka o nkapesitse diaparo tsa poloko,

o mpipile ka kobo ya tshiamo,

jaaka monyadi o tle a ikgabise

ka mokgabo wa ditsheše,

le jaaka monyadwi a tle a ikgabise

ka mekgabo ya gagwe

e e tsabakelang.

11Gonne jaaka lefatshe le tle le ntshe

go kukunya ga lone,

le jaaka tshimo e tle e tlhabise dijalo

tsa yone;

jalo Morena Modimo

o tlaa tlhogisa tshiamo

le pako fa pele ga merafe yotlhe.