DIPALO 19 - SetswanaTswana 1908/1992（TSW08NO）

Go ntlafadiwa ka molora wa kgomo e khunwana

1Jehofa a bua le Moše le Arone, a re:

2“Mo ke gone mo go tlhomilweng ga molao o Jehofa o o laotseng a re: Bua le bana ba Iseraele gore ba go leretse kgomo ya moroba e khunwana e e itekanetseng, e go se nang bogole mo go yone, le e go iseng go bewe jokwe mo go yone.

3Lo e neye Eleasare moperesiti, ene a e ise kwa ntle ga bothibelelo, mme a mongwe a e tlhabe fa pele ga matlho a gagwe.

4Eleasare moperesiti, a tseye ga madi a yone ka monwana, mme madi a yone a a kgatšhetse gasupa kwa ntlheng ya fa pele ga mogope wa bophuthegelo.

5Mongwe a fise kgomo eo ya moroba mo ponong ya gagwe; a fise letlalo la yone le nama ya yone, le madi a yone, le moswang wa yone.

6Moperesiti a tseye logong lwa mosetara, le mosiama, le bohibidu jo bo letlhololo, a di latlhele mo gare ga phiso ya kgomo ya moroba.

7Foo moperesiti a tlhatswe diaparo tsa gagwe, a itlhapise mmele ka metsi, morago ga mo a tsene mo bothibelelong, mme moperesiti o tlaa bo a itshekologile go ya maitseboeng.

8Le yo o fisang kgomo a tlhatswe diaparo tsa gagwe ka metsi, a a itlhapise mmele ka metsi, mme o tlaa bo a itshekologile go ya maitseboeng.

9 A motho mongwe yo o itshekileng a ole molora wa kgomo ya moroba a o beye kwa ntle ga bothibelelo felong gongwe fa gontle; o bolokelwe phuthego ya bana ba Iseraele go dira metsi a tomololo; ke tshupelelo ya boleo.

10Yo o olang molora wa kgomo ya moroba a a tlhatswe diaparo tsa gagwe, o tlaa bo a itshekologile go ya maitseboeng; mme mo baneng ba Iseraele, le mo moennyeng yo o jakileng mo go bone, e nne molao ka bosakhutleng.

Molao o o amanang le go ama setoto

11“Yo o amang setoto sa motho a a itshekologe ka malatsi a supa.

12Ene yoo a a iitshepise ka one ka letsatsi la boraro, ka letsatsi la bosupa a nne boitsheko; fa a ne a se ka a iitshekisa ka letsatsi la boraro, foo o tlaa bo a se boitsheko ka letsatsi la bosupa.

13Le fa e le mang yo o amang setoto sa moswi le fa e ka bo e le mang yo o suleng, mme a se ka a iitshekisa, o itshekolola motlaagana wa ga Jehofa; motho yoo, a a kgaolwe mo Iseraele; a nne boitshekologo ka gonne metsi a tomololo a se ka a kgatšhiwa mo go ene; boitshekologo jwa gagwe bo sa ntse bo le mo go ene.

14“O ke one molao fa motho a swela mo mogopeng: Mongwe le mongwe yo o tsenang mo mogopeng, le mongwe le mongwe yo o mo mogopeng, a nne a itshekologile ka malatsi a supa.

15Le sejana sengwe le sengwe se se sa khurumelwang, se se se nang sekhurumelo se bofeletswe mo go sone, se itshekologile.

16Le fa e le mang mo nageng yo o amang mongwe yo o bolailweng ka tšhaka, le fa e le setoto, kgotsa lesapo la motho, kgotsa phupu, a a itshekologe ka malatsi a supa.

17“Ka ga motho yo o itshekologileng a ba mo tseele molora wa molelo wa tshupelelo ya boleo, mme metsi a a elang a thelwe mo go one mo sejaneng.

18A motho yo o itshekileng a tseye mosiama, a o ine mo metsing, a a kgatšhe mo mogopeng, le mo dijaneng tsotlhe, le mo bathong ba ba neng ba le gona, le mo go ene yo o ne a ama lesapo, kgotsa motho yo o bolailweng kgotsa, moswi kgotsa, phupu.

19A motho yo o itshekileng a kgatšhe yo o itshekologileng ka letsatsi la boraro, le ka letsatsi la bosupa; e re ka letsatsi la bosupa a mo itshekise; a tlhatswe diaparo tsa gagwe, a tlhape mo metsing, mme maitseboa o tlaa nna boitsheko.

20“Mme motho yo o itshekologileng fa a gana go iitshekisa, mowa oo a o kgaolwe o tswe mo gare ga phuthego, ka a itshekolotse ntlo e e botshepo ya ga Jehofa; metsi a tomololo ga a kgatšhiwa mo go ene, o itshekologile.

21A e nne molao o o sa khutleng mo go bone, yo o kgatšhang ka metsi a tomololo a a tlhatswe diaparo tsa gagwe, le yo o amang metsi a tomololo o tlaa itshekologa go ya maitseboeng.

22Le fa e le eng se motho yo o itshekologileng o se amang se tlaa itshekologa, le motho yo o se amang o tlaa itshekologa go ya maitseboeng.”