1“Fa mongwe a leofa ka go re, e rile a le mosupi wa sengwe, a utlwa lentswe la ikaniso, go re, a sengwe o se bonye, kgotsa a o a itse; fa a se ka a se bolela, foo a a belege tshiamololo ya gagwe.
2“Kgotsa fa motho mongwe a ama sengwe se se itshekologileng, le fa e ka bo e le setoto sa phologolo nngwe e e itshekologileng, le fa e le setoto sa dilo tse di ruilweng tse di itshekologileng, le fa e le setoto sa dilo tse di gagabang tse di itshekologileng, mme a sa itse, mme a itshekologa, foo a a nne molato.
3“Gongwe fa a ama boitshekologo jwa motho, le fa boitshekologo jwa gagwe e ka bo e le eng se o ka itshekololwang ka sone, a sa itse, e tlaa re motlhang o itseng, foo a nne molato.
4“Kgotsa fa motho a tshogana ka a ikanne ka molomo wa gagwe, gore o tlaa dira bosula, kgotsa o tlaa dira molemo, le fa e le eng se motho a tshoganang ka a se buile ka ikano, a sa itse; e tlaa re motlhang o go itseng a a nne molato mo go sengwe sa dilo tse.
5“E tlaa re fa a le molato mo go sengwe sa dilo tse, a ipolele se o leofileng mo go sone.
6A a isetse Jehofa tshupelelo ya gagwe ya molato, ka ga boleo jo o bo leofileng, a ise e namagadi ya letsomane, kwanyana le fa e le potsane, e le tshupelelo ya boleo; mme moperesiti o tlaa bo a mo direla tetlanyo ka ga boleo jwa gagwe.
7“Fa a tlhaela, a sa kake a ntsha kwanyana, foo a a lere tshupelelo ya gagwe ya molato wa se o leofileng mo go sone, e le maphoi a le mabedi, kgotsa maebana a le mabedi, mo go Jehofa; lengwe e le tshupelelo ya boleo, le lengwe e le tshupelo e e fisiwang.
8A a di ise kwa moperesiting, ene o tlaa isa le e leng la tshupelelo ya boleo pele, a le soke tlhogo e kgaoge, mme a se ka a le fatoganya.
9A a kgatshe madi a tshupelelo ya boleo ka fa lotlhakoreng lwa sebeso, madi a a setseng a a gamogele le fa tlase ga sebeso; ke tshupelelo ya boleo.
10La bobedi a le ise tshupelo e e fisiwang, ka fa molaong; moperesiti o tlaa bo a mo direla tetlanyo ka ga boleo jo o bo leofileng, mme o tlaa itshwarelwa.
11“Fa a tlhaela, a sa kake a ntsha maphoi a le mabedi, kgotsa maebana a le mabedi, foo a a ise seromololo sa gagwe ka ga boleo jo o bo leofileng, e le kgaogano ya bosome ya seelo sa emere ya setou; a se ka a thela lookwane mo go sone, le gone a se ka a baya lebano mo go sone, gonne ke tshupelelo ya boleo.
12A a se ise kwa moperesiting, mme moperesiti o tlaa tabola mo go sone ka legofi, e le morafolo wa sone; mme a se fisetse mo sebesong, mo godimo ga ditshupelo tsa ga Jehofa tse di dirwang ka molelo; ke tshupelelo ya boleo.
13Moperesiti o tlaa bo a mo direla tetlanyo ka ga boleo jwa gagwe jo o bo leofileng mo go sengwe sa dilo tse, mme o tla itshwarelwa, mme mo go setseng e tlaa nna ga moperesiti jaaka tshupelo ya boupe.”
Ditshupelo tsa molato14Jehofa a bua le Moše a re:
15“Fa motho mongwe a ka dira tlolo, a leofa a sa itse, mo dilong tse di itshepileng tsa ga Jehofa, foo a a isetse Jehofa tshupelelo ya gagwe ya molato, phelefu e e se nang bogole e e tswang letsomaneng, e kaiwe ka fa o tlaa e beelang tlhwatlhwa ya selefera ka dišekele ka gone, e bong šekele sa felo ga boitshepo, gore e nne tshupelelo ya molato.
16A a lere le se o tlodileng mo go sone mo selong se se itshepileng, a se oketse ka kgaogano ya botlhano, a se neye moperesiti; moperesiti o tlaa bo a mo direla tetlanyo ka phelefu ya tshupelelo ya molato, mme o tlaa itshwarelwa.
17“Fa mongwe a leofa, a dira sengwe sa dilo tse Jehofa o laotseng a re di se ka tsa dirwa, le fa a ne a se ka a itse, le fa go ntse jalo o molato, o tlaa belega tshiamololo ya gagwe.
18A a ise kwa moperesiting phelefu e e se nang bogole e e tswang mo letsomaneng, ka fa o e beelang tlhwatlhwa ka gone, gore e nne tshupelelo ya molato; mme moperesiti o tlaa bo a mo direla tetlanyo ka ga sone se o timetseng fela mo go sone a sa itse, mme o tlaa itshwarelwa.
19Ke tshupelelo ya molato; ruri o bo o le molato fa pele ga Jehofa.”
Who We AreWhat We EelieveWhat We Do
2025 by iamachristian.org,Inc All rights reserved.
