DUTERONOME 23 - SetswanaTswana 1908/1992（TSW08NO）

Bao ba ba sa tshwanelang go tsena mo phuthegong

1“Yo o ntshitsweng ntho mo lesotlhong, kgotsa yo o kgaotsweng lepele, a a se tsene mo phuthegong ya ga Jehofa.

2Ngwana wa dikgora a se tsene mo phuthegong ya ga Jehofa; le go ya kwa kokomaneng ya bosome go se nne ope wa gagwe yo o tsenang mo phuthegong ya ga Jehofa.

3 “Moamone kgotsa Momoabe a ba se tsene mo phuthegong ya ga Jehofa; le fa go ile kwa kokomaneng ya lesome go se tsene ope yo e leng wa bone mo phuthegong ya ga Jehofa, le ka bosakhutleng,

4 gonne ga ba a ka ba lo kgatlhantsha ka dijo le metsi mo tseleng, jale ka lo tswa Egepeto; le gonne ba ne ba go thapela Balaame morwa Beore wa kwa Pethore wa Mesopotamia ka tuelo, gore a tle go go hutsa.

5 Le fa go ntse jalo Jehofa Modimo wa gago a gana go reetsa Balaame; Jehofa Modimo wa gago a go fetolela phutso tshegofatso, gonne Jehofa Modimo wa gago o na a go rata.

6O se ka wa batla gore ba nne kagiso, le fa e le gore ba tlhogonolofale ka malatsi otlhe a gago ka bosakhutleng.

7“O se ka wa tlhoa Moetome, gonne ke ngwana wa ga rraeno. O se ka wa tlhoa Moegepeto, gonne o ne o le moeng mo lefatsheng la gagwe.

8Bana ba kolomana ya boraro ba ba ba tsholang ba ka tsena mo phuthegong ya ga Jehofa.

Go dira bophepa jwa bothibelelo jwa batlhabani

9“Fa o bololela baba ba gago o le tlhaolele, foo o ithibe mo go sengwe le sengwe se se bosula.

10Fa go na le monna mongwe mo go lona yo o itshekologileng ka ntlha ya sengwe se o tsogang se mo diralela bosigo, foo a a tswele kwa ntle ga bothibelelo, a a se tsene mo teng ga bothibelelo;

11mme go dirale gore fa go tsena maitseboa a a tlhape ka metsi, mme e tlaa re letsatsi le phirima, a tsene mo teng ga bothibelelo.

12“Le gone o dire le felo gongwe kwa ntle ga bothibelelo, kwa go tlaa iwang ntle gone.

13Mo dibolaong tsa gago o tseye phang; mme go dirale gore fa o ile ntle, o epe ka yone, mme o retologe o bipe mantle a gago.

14Gonne Jehofa Modimo wa gago o sepela mo gare ga bothibelelo jwa gago, go go golola, le go go neela baba ba gago fa pele ga gago; ke gone ka re: ‘A bothibelelo jwa gago bo nne boitshepo, gore a tle a se ka a bona sepe se se leswe mo go wena, mme a go hularela.’

Melao e mengwe

15“Motlhanka yo o tshabetseng mong wa gagwe kwa go wena, o se ka wa mo neela mong wa gagwe.

16A a age nao, mo gare ga gago, mo felong fa o tlaa go itshenkelang mo teng ga kgoro nngwe ya gago, kwa go mo kgatlhang bogolo gone. O se ka wa mo patika.

17 “A go se nne seaka sepe sa bomorwadia Iseraele, le gone, a go se nne mosotoma wa bomorwa Iseraele.

18O se ka wa isa madi a a thapileng seaka, le fa e le tuelelo ya ntša, mo ntlong ya ga Jehofa Modimo wa gago; gonne dilo tseo tsoo pedi di makgapha mo go Jehofa Modimo wa gago.

19 “O se ka wa adima ngwana wa ga rraeno ka go lopa kokeletso; koketso ya madi, koketso ya dijo, kgotsa koketso ya sengwe fela se se tleng se adingwe ka go lopa kokeletso.

20Wa tšhaba ene, o ka mo adima ka go lopa kokeletso; mme ngwana wa ga rraeno ene, o se ka wa mo adima ka go lopa kokeletso, gore Jehofa Modimo wa gago a go segofatse mo go tsotlhe tse o di bayang seatla, mo lefatsheng le o tsenang mo go lone o ya go le rua.

21 “E re mogang o ikanelang Jehofa Modimo wa gago ka ikano, o se ka wa nna bonya go e lefa, gonne ruri Jehofa Modimo wa gago o tlaa e batla mo go wena; mme e ne e tlaa nna boleo mo go wena.

22Fa o ka ikgogona go ikana, e tlaa bo e se boleo mo go wena.

23Se se duleng mo molomong wa gago o se tlhokomele go se dira, ka fa o ikanetseng Jehofa Modimo wa gago ka gone, ke tshupelo ya peleego e o e tlhomamisitseng ka molomo wa gago.

24“E re o tsena mo tshimong ya mofine ya wa gaeno, foo o ka ja loungo lwa mofine o kgora ka fa o ratang ka gone, mme o se ka wa tsenya sepe mo tokelong ya gago.

25E re fa o tsena mo mabeleng a a emeng a motho wa gaeno, foo o ka roba diako ka seatla sa gago; o se ka wa ota thipa mo mabeleng a motho wa gaeno.