1 Bafarisai le Basadukai ba tla, ba mo lopa gore a ba supetse sesupo se se tswang legodimong, mme ba bo ba mo lalela.
2Mme a ba fetola a re: “E a re fa go le maitseboa, lo a tle lo re: ‘Go tlaa tsoga go sele; ka legodimo le le lehibidu.’
3E re ka moso lo re: ‘Go tlaa tsoga go sele; ka legodimo le le lehibidu le bontsho.’ Lo itse go lemoga ponalo ya legodimo; mme lo palelwa ke go re metlha e kaela kae
4 Losika lo lo bosula, le lwa boaka, lo batla sesupo; mme ga lo ketla lo newa sesupo sepe, fa e se sesupo sa ga Jona.” Mme a ba tlogela a tsamaya.
Sebediso sa Bafarisai le Basadukai(Mar 8:14-21)5Barutwa ba fitlha kwa moseja, mme ba bo ba lebetse go tsaya dinkgwe.
6 Mme Jesu a ba raya a re: “Tlhokomelang, lo bo lo itise mo sebedisong sa Bafarisai le Basadukai.”
7Mme ba tseisanya kgang ba re: “Ke ka gobo re se ka ra tsaya senkgwe.”
8Jesu ka a lemoga a re: “Lona ba tumelonyana, lo tseisanyeditseng kgang ka gobo lo se na dinkgwe?
9 A ga lo ise lo lemogo, le fa e le go gakologelwa dinkgwe tse tlhano, tsa ba ba 5 000, le bokae jwa diroto tse lo seletseng mo go tsone?
10 Le fa e le dinkgwe tse di supang tsa ba 4 000, le bokae jwa diroto tse lo seletseng mo go tsone?
11Ana go ntse jang lo sa lemoge fa ke ne ke sa bue le lona ka ga dinkgwe? Mme e le gore lo itise mo sebedisong sa Bafarisai le Basadukai.”
12Foo ba tlhaloganya fa a sa ba tlhagise ka ga sebediso sa senkgwe, mme e le ka ga thuto ya Bafarisai le Basadukai.
Polelo ya ga Petere ka ga Jesu(Mar 8:27-30; Luke 9:18-21)13Jaana e rile Jesu a fitlha mo dintlheng tsa Kaesarea Filipi, a botsa barutwa ba gagwe a re: “Ana batho ba tle ba re nna Morwa Motho ke mang?”
14 Ba re: “Bangwe ba re: Johane Mokolobetsi; ba bangwe ba re: Elija; le ba bangwe ba re: Jeremia, kgotsa mongwe wa baperofeti.”
15A ba raya a re: “Me lona lwa re nna ke mang?”
16 Simone Petere a mo fetola a re: “O Keresete, Morwa Modimo o o tshedileng.”
17Jesu a mo fetola a re: “O sego, Simone morwa Jona; gonne ga o a go senolelwa ke nama le madi, fa e se ke Rre yo o kwa legodimong.
18Le nna ke go raya ke re: O Petere, mme ke tlaa aga phuthego ya me mo lefikeng le; mme dinonofo tsa Bobipo ga di ketla di e fenya.
19 Ke tlaa go neela dikopololo tsa bogosi jwa legodimo; se o tlaa se bofang mo lefatsheng, se tlaa bo se bofilwe kwa legodimong; mme se o tlaa se bofololang mo lefatsheng, se tlaa bo se bofolotswe kwa legodimong.”
20Foo a laya barutwa gore ba se ka ba bolelela ope fa e le ene Keresete.
Jesu o bolelelapele loso lwa gagwe(Mar 8:31 – 9:1; Luke 9:22-27)21Go simolola ka lobaka loo, Jesu a nna a tlhaloganyetsa barutwa ba gagwe fa a na le go ya kwa Jerusalema, le go bogisiwa dilo di le dintsi ke bagolwane le baperesiti ba bagolo le bakwadi, le go bolawa, le go ba a tsosiwa ka letsatsi la boraro.
22Mme Petere a mo isa fa thoko, a simolola go mo omanya a re: “A go nne kgakala nao, Morena; mo ga go ketla go go dirafalela gope.”
23Mme ene a retologa, a raya Petere a re: “Tloga fa pele ga me Satane; gonne o sekgopi mo go nna; ka gobo ga o tlhokomele dilo tsa Modimo, fa e se dilo tsa batho fela.”
24 Foo Jesu a raya barutwa ba gagwe a re: “Fa motho le fa e le mang a rata go ntshala morago, a a iitatole, mme a a tseye mokgoro wa gagwe a itse go ntshala morago.
25 Gonne le fa e le mang yo o ratang a ka bo a boloka botshelo jwa gagwe, bo tlaa mo latlhegela; mme yo o latlhegelwang ke botshelo jwa gagwe, ka ntlha ya me, o tlaa bo bona.
26Gonne motho o tlaa bo a ka thusega eng, le fa a ka fenya lefatshe lotlhe, mme a latlha botshelo jwa gagwe? Kgotsa, se motho o ka se ntshang a se baya mo boemong jwa botshelo jwa gagwe ke eng?
27 Gonne Morwa Motho o tlaa tla ka kgalalelo ya ga Rraagwe, a na le baengele ba gagwe; e dira gone o tlaa duelang mongwe le mongwe ka fa ditirong tsa gagwe.
28Ammaaruri ke a lo raya: Go bangwe ba bone ba ba emeng fa, ba ba se ketlang ba utlwa loso gope, go tsamaya ba bona Morwa Motho a tla mo bogosing jwa gagwe pele.”
Who We AreWhat We EelieveWhat We Do
2025 by iamachristian.org,Inc All rights reserved.
