1Jehofa, ke ikantse mo go wena,
a ke se tlhajwe ke ditlhong
gope.
2Nkgolola ka tshiamo ya gago,
me o mphalodise;
ntshekegela tsebe ya gago,
o mpoloke.
3O nne lefika la me la boago,
le ke ka nnang ka ya mo go lone
ka gale;
o ntshitse taolo
ya gore ke bolokwe;
gonne o lefika la me,
le kago ya me ya phemelo.
4Mphalodisa, Modimo wa me,
mo seatleng sa moikepi,
mo seatleng sa mosiamolodi
yo o bolalome.
5Gonne o tsholofelo ya me,
Jehofa, Modimo;
o sa le o nna boikanyo jwa me
le mo bokaung jwa me.
6O sa le o nkokotletsa
ke sa tswa sebopelong;
ke wena yo o nntshitseng
mo maleng a ga mme;
pako ya me e tlaa nna
ka ga gago ka gale.
7Ke ntse jaaka segakgamatso
mo bathong ba le bantsi;
mme wena o botshabelo jwa me
jo bo thata.
8Molomo wa me
o tlaa tlala pako ya gago,
le tlotlo ya gago
ka letsatsi lotlhe.
9Se ntatlhe
mo motlheng wa botsofe;
se ntlogele
mogang thata ya me e felang.
10Gonne baba ba me
ba bua ka ga me;
le ba ba lalelang mowa wa me
ba a gakololana.
11Ba re:
“Modimo o mo tlogetse,
mo lateleleng, lo mo tshware;
gonne ga go na ope
yo o ka gololang.”
12Ao Modimo!
Se nne kgakala le nna;
ao, Modimo wa me!
Akofela go nthusa.
13Bone ba e leng baganetsi ba mowa
wa me, a ba tlhajwe ke ditlhong
ba nyelediwe; ba ba batlang
gore ke utlwe botlhoko
a ba bipiwe ka kgobo le tlotlologo.
14Nna ke tlaa nna ke solofela fela
ka gale,
ke tlaa fela ke ntse ke go baka
bogolo bogolo.
15Molomo wa me o tlaa bolela
ka ga tshiamo ya gago,
le ka ga poloka ya gago
ka letsatsi lotlhe;
gonne ga ke itse palo ya tsone.
16Ke tlaa tla le ditiro tsa nonofo,
tsa ga Jehofa, Modimo;
ke tlaa umaka tshiamo ya gago,
e e leng ya gago yosi.
17Modimo o sa le wa nna wa nthuta
le mo bokaung jwa me,
ke ntse ke bolela ditiro tsa gago
tse di gakgamatsang,
nako e sa le eno.
18Ee, le gone, e tlaa re ke tsofetse
ke thuntse tlhogo,
Modimo, o se ka wa ntlogela;
go bo go tle go tsamaye
ke bolelele kokomana e e tlang
thata ya gago,
le nonofo ya gago ke e bolelele
mongwe le mongwe yo o tlaa tlang.
19Tshiamo ya gago, Modimo,
le yone e godimo thata;
wena Modimo
yo o dirileng dilo tse dikgolo,
yo o tshwanang nao
ya bo e le mang?
20Wena yo o re bontshitseng
ditlalelo di le dintsi
le tse di botlhoko,
o tlaa ba o re rudisa gape,
mme o tlaa ba o re kwetola gape
o re ntsha kwa matenyeng
a lefatshe.
21Totisa bogolo jwa me,
o bo o retologe gape,
o nkgomotse.
22Le gone, ke tlaa go baka ka saletare,
e bong boammaaruri jwa gago,
Modimo wa me;
ke tlaa go opelela ka harepe,
wena Moitshepi wa Iseraele.
23Dipounama tsa me
di tlaa itumela thata
mogang ke go opelelang dipako;
le mowa wa me o o o rekolotseng.
24Loleme lwa me le lone
lo tlaa bua ka ga tshiamo ya gago
ka letsatsi lotlhe;
gonne ba tlhabilwe ke ditlhong,
gonne ba sosobagantswe,
ba ba batlang gore ke utlwe
botlhoko.
Who We AreWhat We EelieveWhat We Do
2025 by iamachristian.org,Inc All rights reserved.
