JEREMIA 23 - SetswanaTswana 1908/1992（TSW08NO）

Tsholofetso ya motlha o o tlang

1“A bo go latlhega badisa ba ba senyang ba falatsa dinku tsa bohulo jwa me!” Go bua Jehofa.

2Ke gone ka moo Jehofa Modimo wa Iseraele o bua jaana ka ga badisa ba ba otlang batho ba me, a re: “Lo faladitse letsomane la me, lo ba lelekile, mme ga lo a ka lwa ba tlhola; bonang, ke tlaa lo sekisetsa bosula jwa ditiro tsa lona,” go bua Jehofa.

3“Ke tlaa phutha malotsi a letsomane la me, ke a ntsha kwa mafatsheng kwa ke a leleketseng teng, ke tlaa ba ke a bosetsa mo marakaneng a one, a tlaa bona lotsalo a ntsifala.

4Ke tlaa tlhoma badisa mo go one ba ba tlaa a otlang; ga a ketla a tlhola a boifa, le fa e le go tseana, le gone ga go ketla go tlhokafala lepe,” go bua Jehofa.

5 “Bonang, metlha e etla,” go bua Jehofa, “e ke tlaa tsosetsang Dafite Letlhogela la tshiamo ka yone, mme o tlaa busa jaaka kgosi, a ba a dira ka botlhale, o tlaa dirafatsa katlholo le tshiamiso mo lefatsheng.

6E tlaa re mo metlheng ya gagwe Juta o tlaa bolokwa, Iseraele o tlaa aga ka thagamo; mme le, ke lone leina la gagwe le o tlaa bidiwang ka lone, go twe: ‘Jehofa ke tshiamo ya rona.’

7Ke gone, bonang, metlha e etla,” go bua Jehofa, a re: “Ga ba ketla ba tlhola ba bua, ba re: ‘Jaaka Jehofa a tshedile, yo o tlhatlositseng bana ba Iseraele mo lefatsheng la Egepeto;’

8fa e se go re: ‘Jaaka Jehofa a tshedile, yo o tlhatlositseng, a goga losika lwa ntlo ya Iseraele, a lo ntsha mo lefatsheng la botsheka, le mo mafatsheng otlhe kwa ke ne ke ba leleketse teng;’ mme ba tlaa aga mo lefatsheng la ga bone.”

Molaetsa wa ga Jeremia ka ga baperofeti

9Ka ga baperofeti.

Pelo ya me mo teng ga me

e phatlogile,

marapo a me otlhe

a a phamphanyega,

ke ntse jaaka motho yo o tagilweng,

le jaaka yo bojalwa jwa mofine

bo mo fentseng;

ka ntlha ya ga Jehofa,

le ka ntlha ya mafoko a gagwe

a a boitshepo.

10Gonne lefatshe le tletse bagokafadi;

gonne lefatshe le a lela

ka ntlha ya go rogakana;

mafulo a naga a omeletse;

go lemala ga bone go bosula,

le nonofo ya bone ga e a siama.

11“Gonne go le moperofeti

go le moperesiti

ba tlhapafetse botlhe,

ee, ke fitlhetse boikepo jwa bone

mo ntlong ya me,” go bua Jehofa.

12“Ke gone ka moo tsela ya bone

e tlaa nnang jaaka mareledi

mo lefifing;

ba tlaa kgweelediwa kwa pele,

mme ba tlaa wa mo go one;

gonne ke tlaa lere bosula mo go

bone, e bong ngwaga

wa tshekiso ya bone,”

go bua Jehofa.

13“Ke bonye boeleele

mo baperofeting ba Samaria;

ba ne ba perofesa ka Baale,

ba timetsa Baiseraele batho ba me.

14 Le mo baperofeting ba Jerusalema

ke bonye selo

se se tsitlisang marapo;

ba a akafala, ba sepela ka maaka,

ba thatafatsa diatla

tsa badira bosula,

mme go bo go se ope

yo o boang

mo boikepong jwa gagwe:

botlhe fela ba fetogile,

ba ntse jaaka Sotoma mo go nna,

le banni ba teng

ba ntse jaaka Gomora.”

15Ke gone ka moo Jehofa wa masomosomo o buang jaana ka ga baperofeti, a re:

“Bonang, ke tlaa ba jesa longana,

ke tlaa ba nosa metsi a santlhokwe;

gonne go tlhapatsa go dule

mo baperofeting ba Jerusalema,

go ile le lefatshe lotlhe fela.”

16Jehofa wa masomosomo o bua jaana, a re: “Lo se ka lwa reetsa mafoko a baperofeti ba ba lo perofesetsang; ba lo ruta boithamako; ba bua ponatshegelo ya pelo ya bone fela, e seng e e tswang mo molomong wa ga Jehofa.

17Ba tlhola ba ntse ba raya ba ba nnyatsang, ba re: ‘Jehofa o rile lo tlaa bona kagiso;’ ba reye mongwe le mongwe yo o sepelang ka fa logwading lwa pelo ya gagwe, ba re: ‘Ga go na bosula bope jo bo tlaa tlang mo go lona.’

18“Gonne e mang yo o kileng a ema le ba lekgotla la ga Jehofa, gore a lemoge a utlwe lefoko la gagwe? E mang yo o kileng a tlhokomela lefoko la me go le utlwa?

19Bonang ledimo la ga Jehofa, e bong tšararego ya gagwe, le tsogile. Ee, ke ledimo le le sokeletsang; le tlaa thubegela mo tlhogong ya baikepi.

20Bogale jwa ga Jehofa ga bo ketla bo bowa, go tsamaya a dirafatsa, le go tsamaya a dira maikaelelo a pelo ya gagwe; mo metlheng ya bofelo lo tlaa se tlhaloganya ka botlalo.

21“Ga ke a roma baperofeti ba, le fa go ntse jalo ba tabogile; ga ke a bua nabo, le fa go ntse jalo, ba perofesitse.

22Fa ba ka bo ba eme le ba lekgotla la me, foo ba ka bo ba utlwisitse batho ba me mafoko a me, ba ka bo ba ba busitse mo tseleng ya bone e e bosula, le mo bosuleng jwa ditiro tsa bone.

23“A ke Modimo wa bogaufi,” go bua Jehofa, “mme ke se Modimo wa kwa kgakala?

24A mongwe o ka iphitlha mo mafelong a a sa itsiweng ke sa mmone?” go bua Jehofa. “A ga ke a tlala ka legodimo le ka lefatshe?” Go bua Jehofa.

25“Ke utlwile se baperofeti ba se buileng, ba ba perofesang maaka ka leina la me, ba re: ‘Ke lorile, ke lorile.’

26Selo se se tlaa nna mo pelong ya baperofeti ba ba perofesang maaka, goleele go le kaye; e bong baperofeti ba tsietso ya pelo tsa bone fela?

27Ba ba itlhomang ba tlaa lebatsa batho ba me leina la me ka ditoro, tse mongwe le mongwe o di bolelelang wa ga gabo, jaaka borraabo ba ne ba lebala leina la me ka Baale.

28Moperofeti yo o nang le toro a bolele toro; le yo o nang le lefoko la me, a bue lefoko la me ka boikanngo. Motlhaka ke eng fa o ka tshwantshiwa le mabele?” Go bua Jehofa.

29“A lefoko la me ga le a nna jaaka molelo?” Go bua Jehofa; “le jaaka noto e e thubaganyang lefika?

30Ke gone bonang, ke tlhabana le baperofeti ba ba utswang mafoko a me,” go bua Jehofa, “mongwe le mongwe a a utswe mo go wa ga gabo.

31Bonang, ke tlhabana le baperofeti,” go bua Jehofa, “ba ba buang ka diteme tsa bone ba re: ‘A re.’

32Bonang, ke tlhabana le ba ba perofesang ditoro tsa maaka,” go bua Jehofa, “ba di bolele, ba timetse batho ba me ka maaka a bone, le ka go ipelafatsa ga bone ga boithamako; le fa go ntse jalo ga ke a ba roma, le fa e le go ba laola; le gone ga ba ketla ba thusa batho ba sepe.” Go bua Jehofa.

Baperofeti ke morwalo wa Morena

33“Mogang batho ba, kgotsa moperofeti, kgotsa moperesiti, ba tlaa go botsang, ba re: ‘Molaetsa wa ga Jehofa ke eng?’ Foo o ba reye o re: ‘Molaetsa ofe? Ke tlaa lo latlha, go bua Jehofa.’

34Ka ga moperofeti, le moperesiti, le batho ba ba buang, ba re: ‘Molaetsa wa ga Jehofa ke o,’ ke tlaa betsa motho yoo fela le ntlo ya gagwe.

35A mongwe le mongwe a bue jaana le wa ga gabo, le mongwe le mongwe a bue le ngwana a rraagwe, a re: ‘Jehofa, o fetotse jang?’ le go re: ‘Jehofa o buileng?’

36Lo se ka lwa tlhola lo umaka molaetsa wa ga Jehofa; gonne lefoko la motho mongwe le mongwe e tlaa nna lone molaetsa wa gagwe; gonne lo sentse mafoko a Modimo o o tshedileng, a ga Jehofa wa masomosomo, Modimo wa rona.

37O reye moperofeti jaana, o re: ‘Jehofa o go fetotse jang?’ Le go re: ‘Jehofa o buileng?’

38E tlaa re fa lo re: ‘Molaetsa wa ga Jehofa;’ ke gone Jehofa o buang jaana; a re: ‘E re ka lo bua lefoko le, e bong Molaetsa wa ga Jehofa, mme nna ke romile kwa go lona, ka re; Lo se ka lwa bua lwa re: Molaetsa wa ga Jehofa;’

39ke gone bonang, ke tlaa lo lebalela ruri, ke tlaa lo latlhela koo, le motse o ke o lo neileng le borraeno, lo tlaa tloga fa pele ga me.

40Ke tlaa lere kgobo e e sa khutleng mo go lona, le ditlhong tse di sa yeng kae, tse di se ketlang di lebalwa.”