1 Nayang Jehofa,
lona bomorwa ba ba thata,
nayang Jehofa kgalalelo le nonofo.
2Nayang Jehofa kgalalelo
e e tshwanetseng leina la gagwe;
obamelang Jehofa
mo bontleng jwa boitshepo.
3Lentswe la ga Jehofa
le mo godimo ga metsi;
Modimo wa kgalalelo
o dumisa maru,
e bong ene Jehofa
mo godimo ga metsi a magolo.
4Lentswe la ga Jehofa le nonofile;
lentswe la ga Jehofa le tletse borena.
5Lentswe la ga Jehofa
le roba ditlhare tsa masetara;
ee, Jehofa o robaganya masetara
a Lebanone.
6O bile o a kalapisa jaaka namane;
Lebanone le Sirione
jaaka pholwana ya nare.
7Lentswe la ga Jehofa le fatoganya
dikgabo tsa molelo.
8Lentswe la ga Jehofa
le roromisa naga;
Jehofa o roromisa naga ya Kateša.
9Lentswe la ga Jehofa
le tsadisa ditshephe,
le be le fotlhele dikgwa ruri;
mme mo tempeleng ya gagwe dilo
tsotlhe tsa re: “Kgalalelo!”
10Jehofa o ne a dutse
e le kgosi kwa morwaleleng;
ee, Jehofa o dutse e le kgosi
ka bosakhutleng.
11Jehofa o tlaa naya batho ba gagwe
nonofo;
Jehofa o tlaa segofatsa batho
ba gagwe ka kagiso.
Who We AreWhat We EelieveWhat We Do
2025 by iamachristian.org,Inc All rights reserved.
