1O se ka wa itshwenya
ka ga badirabosula;
le gone o se ka wa nna pelotshetlha
ka ga ba ba dirang tshiamololo.
2Gonne ba tlaa akofa ba segwa
jaaka bojang, ba tlaa swaba
jaaka morogo o motala.
3Ikanye Jehofa, o bo o dire molemo;
aga mo lefatsheng
o latelele boikanngo.
4Le gone o inatefise mo go Jehofa;
mme o tlaa go naya dikeletso
tsa pelo ya gago.
5Pitikela tsela ya gago mo go Jehofa;
o bo o mo ikanye
mme, o tlaa go dirafatsa.
6O tlaa dira gore tshiamo ya gago
e tswe jaaka lesedi,
le katlholo ya gago
jaaka motshegare.
7Itapolose mo go Jehofa,
o mo lebelele ka pelotelele;
o se ka wa itshwenya
ka ga yo o segofalang
mo tseleng ya gagwe;
ka ntlha ya monna
yo o dirafatsang maano a a bosula.
8Bakela bogale, o lese kgakalo;
o se ka wa itshwenya,
ka go itshwenya
go tle go ise kwa bosuleng.
9Gonne badirabosula
ba tlaa kgaolwa;
mme ba ba lebeletseng mo go Jehofa
ba tlaa rua lefatshe.
10Gonne e tlaa re kwa pelenyana,
moikepi a bo a sa tlhole a le gone.
Ee, o tlaa sekaseka felo ga gagwe
ka tlhoafalo,
mme ene o tlaa ba a seyo.
11 Bapelonomi ba tlaa rua lefatshe;
ba tlaa inatefisa
mo letlotlong la kagiso.
12Moikepi o logela mosiami maano,
mme o mo šenele meno.
13Morena o tlaa mo tshega,
ka a bona fa letsatsi la gagwe
le atamela.
14Baikepi ba somotse tšhaka,
ba bile ba obile bora jwa bone;
go tla ba diga bahumanegi
le batlhoki le go bolaya
ba ba mokgwa o o lolameng.
15Tšhaka ya bone e tlaa tsena
mo pelong tsa bone ka bosi,
mara a bone le one a tlaa rojwa.
16Bonnye jo mosiami o nang najo
bo molemo bogolo go matlotlo
a baikepi ba le bantsi.
17Gonne mabogo a baikepi
a tlaa rojwa;
mme Jehofa o tshegeditse basiami.
18Jehofa o itse malatsi a baitekanedi;
boswa jwa bone
bo tlaa nna ka bosakhutleng.
19Ga ba ketla ba tlhajwa ke ditlhong
mo motlheng wa bosula;
mo metlheng ya moswele
ba tlaa kgora.
20Baikepi ba tlaa nyelela;
baba ba ga Jehofa
ba tlaa nna jaaka monono
wa mafulo a dikgomo;
ba tlaa fela;
ba tlaa fela ba kua mosi fela.
21Moikepi o tle a adime,
mme a se ke a buse;
mme mosiami o dira ka pelotshweu,
a neye fela.
22Gonne ba ba segofadiwang ke ene,
ba tlaa rua lefatshe;
mme ba ba hutsiwang ke ene,
ba tlaa kgaolwa.
23Ditsamao tsa motho
di tlhomamisiwa ke Jehofa;
mme o natefelwa ke tsela ya gagwe.
24Le fa a wa,
ga a ketla a batanyetsegela ruri;
ka gobo Jehofa o mo tshegeditse
ka seatla sa gagwe.
25Nkile ka ne ke le lekau
mme jaana ke tsofetse;
le fa go ntse jalo
ga ke ise nke ke bone mosiami
a latlhilwe, le fa e le bana
ba gagwe ba legalegela dijo.
26Ka letsatsi lotlhe
o tlhola a dira ka pelotshweu,
a adime, mme losika lwa gagwe
lo segofale.
27Tlogela bosula, o dire molemo;
mme o nne ka bosaengkae.
28Gonne Jehofa o rata katlholo;
ga a latlhe baitshepi ba gagwe;
ba tlamelwa ka bosenabokhutlo;
losika lwa baikepi lo tlaa kgaolwa.
29Basiami ba tlaa rua lefatshe,
ba tlaa aga mo go lone
ka bosakhutleng.
30Molomo wa mosiami o bua
ka ga botlhale,
le loleme lwa gagwe
lo bua se se siamisang.
31Molao wa Modimo wa gagwe
o mo pelong ya gagwe;
ga go dikgato dipe tsa gagwe
tse di tlaa relelang.
32Moikepi o ikwaetse mosiami,
o batla go mmolaya.
33Jehofa ga a ketla a mo lesa
mo seatleng sa gagwe,
le fa e le go mo sekisa
mogang o atlholwang.
34Lebelela mo go Jehofa,
o bo o tshware tsela ya gagwe,
mme o tlaa go goletsa
go tla o rua lefatshe;
e tlaa re mogang baikepi ba
kgaolwang, o tlaa go bona.
35Ke bonye moikepi
a na le thata e kgolo,
a inamisa jaaka setlhare se setala
se le mo mmung wa sone
wa tlholego.
36Mongwe a feta,
mme bonang, o ne a seyo;
ee, ka mo senka,
mme o ne a se kake a bonwa.
37Lepa moitekanedi,
o lebe mothokgami;
gonne bokhutlo jwa motho yoo
ke kagiso.
38Ka ga batlodi,
ba tlaa senngwa mmogo;
bokhutlo jwa baikepi
ba tlaa kgaolwa.
39Poloko ya basiami
e tswa mo go Jehofa;
ke ene kago ya bone e e thata
ya phemelo
mo motlheng wa khuduego.
40Jehofa o a ba thusa,
o a ba falodisa;
o ba falodisa mo baikeping,
a ba boloke,
ka gobo ba tshabetse mo go ene.
Who We AreWhat We EelieveWhat We Do
2025 by iamachristian.org,Inc All rights reserved.
