1Jehofa,
o ntse o le boago jwa rona
mo tshikatshikeng tsotlhe.
2E rile pele, dithaba di ise di tsalwe,
le gone e rile
o ise o bope lefatshe le lobopo,
fela go tswa kwa bosasimologeng
go ya kwa bosakhutleng,
wa bo o ntse o le Modimo fela.
3O a tle o bosetse motho
kwa tshenyegong, mme o re:
“Bowang lona bana ba batho.”
4 Gonne mo matlhong a gago
dinyaga di le makgolo a le some
di ntse jaaka maabane fela
fa a fetile,
le jaaka tiso ya bosigo fela.
5O a tle o ba tlosetse koo
jaaka ekete ka morwalela;
ba ntse jaaka boroko fela;
e re ka moso boo ba ntse jaaka
bojang jo bo golang.
6E re ka moso bo kgabe, bo gole,
e re maitsebowa bo segwe
mme bo omelele.
7Gonne re nyelediwa
mo bogaleng jwa gago,
le mo kgalefong ya gago
re a tlalelwa.
8O beile maikepo a rona
fa pele ga gago,
maleo a rona a a fitlhegileng
o a beile mo leseding
la sefatlhogo sa gago.
9Gonne malatsi otlhe a rona
a fetisiwa mo kgalefong ya gago;
re swetsa dinyaga tsa rona
jaaka polelo e e bolelwang fela.
10Malatsi a dinyaga tsa rona
ke dinyaga di le masome a supa,
gongwe e ka nna dinyaga
di le masome a a ferang mebedi
ka ntlha ya thata;
le fa go ntse jalo,
boipelafatso jwa one
ke tapiso le bohutsana fela,
gonne bo ile ka bofefo,
mme re fofele koo.
11E mang yo o itseng
thata ya bogale jwa gago,
le kgalefo ya gago
ka fa poifong e e go tshwanetseng?
12Jalo o re rute
go bala malatsi a rona,
gore re tle re itseele
pelo ya botlhale.
13Bowa, Jehofa;
e tlaa nna goleele go le kaye?
A ko o ikwatlhaye
ka ga batlhanka ba gago.
14A ko o re kgorise
boutlwelobotlhoko jwa gago
go le ka moso,
gore re tle re itumele,
re ipele ka malatsi otlhe a rona.
15Re ipedise ka fa malatsing
a o re utlwisitseng botlhoko ka one,
le dinyaga tse re bonyeng bosula
mo go tsone.
16A tiro ya gago
e bonalele batlhanka ba gago,
le kgalalelo ya gago
mo baneng ba bone.
17A bontlentle jwa ga Jehofa,
Modimo wa rona,
bo nne mo go rona;
mme o tlhomamise
tiro ya diatla tsa rona mo go rona;
ee, tiro ya diatla tsa rona
o e tlhomamise.
Who We AreWhat We EelieveWhat We Do
2025 by iamachristian.org,Inc All rights reserved.
