PESALEMA 146 - SetswanaTswana 1908/1992（TSW08NO）

Kgalaletso ya ditiro tsa ga Jehofa tse di siameng

1Bakang Jehofa,

baka Jehofa,

wena mowa wa me.

2Ke tlaa nna ke baka Jehofa

ke sa ntse ke tshedile;

ke tlaa opelela Modimo wa me

dipako ka ke sa ntse ke leyo.

3Lo se ka lwa ikanya dikgosana,

le fa e le ngwana wa motho yo

go se nang thuso epe mo go ene.

4Mowa wa gagwe o a tswa,

mme a boele mo mmung wa gagwe;

ka letsatsi leo fela

maikaelelo a gagwe a nyelele.

5Go sego ene

yo Modimo wa ga Jakobe e leng

thuso ya gagwe,

yo tsholofelo ya gagwe

e leng mo go Jehofa Modimo

wa gagwe;

6o o dirileng legodimo le lefatshe,

lewatle, le tsotlhe tse di mo go tsone;

o o tshegetsang boammaaruri

ka bosakhutleng;

7O o diraletsang bapatikwi tshiamiso;

o o fang

ba ba bolawang ke tlala dijo;

Jehofa o golola bagolegwi.

8Jehofa o budulola matlho a difofu;

Jehofa o topalatsa ba ba obameng;

Jehofa o rata basiami.

9Jehofa o boloka baeng;

o tshegetsa khutsana

le mosadi wa motlholagadi;

mme tsela ya moikepi a e ribege.

10Jehofa o tlaa busa ka bosakhutleng,

e bong Modimo wa gago Sione,

go ya tshikatshikeng tsotlhe fela.

Bakang Jehofa.