1Ke rata Jehofa,
gonne o utlwile lentswe la me,
le mekokotlelo ya me.
2Ka a ntshekegetse tsebe ya gagwe,
ke gone ke tlaa nnang ke mmitsa
ka ke sa ntse ke tshedile.
3Dikgole tsa loso
di ne di ntsentse gare,
matlhoko a Bobipo a ntshwere;
ka bona tlalelo le bohutsana.
4Foo ka bitsa leina la ga Jehofa;
ka re: “Jehofa, ke a go rapela,
golola mowa wa me.”
5Jehofa o pelotshweu, o tshiamo;
ee, Modimo wa rona
o kutlwelobotlhoko.
6Jehofa o boloka
ba ba sa tlhalefang;
ke ne ke ngotlilwe,
mme a mpoloka.
7Boela mo boikhutsong jwa gago,
wena mowa wa me,
gonne Jehofa o go diretse sentle
ka mo go feteletseng.
8Gonne o golotse mowa wa me
mo losong,
le matlho a me mo dikeleding,
le dinao tsa me gore ke se we.
9Ke tlaa sepela fa pele ga Jehofa
mo lefatsheng la batshedi.
10 Ke a dumela, gonne ke tlaa bua:
“Ke ne ke patikegile thata;”
11ka bua mo go potlakeng ga me,
ka re:
“Batho botlhe ke maaka fela.”
12Ke tlaa ntshetsa Jehofa eng
ka ntlha ya masego otlhe a gagwe
a o a ntiretseng?
13Ke tlaa tsaya senwelo sa poloko,
mme ke tlaa bitsa leina la ga Jehofa.
14Ke tlaa lefela Jehofa maikano a me,
ee, fa pele ga batho botlhe
ba gagwe.
15Loso lwa baitshepi ba gagwe
lo tlotlega thata
mo matlhong a ga Jehofa.
16Jehofa, ruri ke motlhanka wa gago;
ke motlhanka wa gago,
ke ngwana wa lelata la gago;
o hunolotse dikgolego tsa me.
17Ke tlaa go isetsa
setlhabelo sa tebogo,
mme ke tlaa bitsa leina la ga Jehofa.
18Ke tlaa lefela Jehofa maikano a me,
ee, fa pele ga batho botlhe
ba gagwe;
19mo malwapeng a ntlo ya ga Jehofa,
mo gare ga gago, wena Jerusalema.
Bakang Jehofa.
Who We AreWhat We EelieveWhat We Do
2025 by iamachristian.org,Inc All rights reserved.
