1Ke tlaa go godisa Jehofa;
gonne o ntsholeditse,
ga o a ka wa naya baba ba me
gore ba itumele ka nna.
2Jehofa, Modimo wa me,
ke go ikuetse,
mme o mphodisitse.
3Jehofa, o tlhatlositse mowa wa me
mo Bobipong;
o ntse o ntshedisitse
gore ke se ka ka fologela mo moleteng.
4Opelelang Jehofa dipako,
lona baitshepi ba gagwe,
ntshetsang leina la gagwe
le le boitshepo malebogo.
5Gonne bogale jwa gagwe
bo ema ka ponyo ya leitlho fela;
mo tlhogonolofatsong ya gagwe
go botshelo;
go ka lala go le selelo bosigo,
mme e re ka moso
go bo go tle boitumelo.
6Ka ga me,
e rile mo go kokotlegeleng ga me,
ke buile, ka re: “Ga nketla
ke ba ke tshikinyega gope.”
7Wena, Jehofa, ka botsalano jwa gago
o tiisitse thaba ya me gore e eme
e nne thata;
o ne wa iphitlha sefatlhogo;
ka fuduega.
8Ka kuela koo go wena, Jehofa;
ka isa mekokotlelo kwa go Jehofa.
9“E tlaa re ke fologela mo moleteng,
madi a me a tlaa bo a na le
molemo ofe?
A lorole lo tlaa go baka?
A lo tlaa bolela boammaaruri
jwa gago?
10Utlwa, Jehofa,
o nkutlwele botlhoko;
Jehofa a e nne wena
mothusi wa me.”
11Selelo sa me o se mphetoletse pino;
o nkapotse letsela la kgetse,
o ntlamile ka boitumelo;
12e le gore kgalalelo ya me
e go opelele pako,
mme e se ka ya didimala.
Jehofa Modimo wa me,
ke tlaa go leboga ka bosakhutleng.
Who We AreWhat We EelieveWhat We Do
2025 by iamachristian.org,Inc All rights reserved.
