PESALEMA 85 - SetswanaTswana 1908/1992（TSW08NO）

Thapelo ya go kopela Iseraele kutlwelobotlhokoPesalema ya bomorwa Kora. Ya moopedi yo mogolo.

1Jehofa, o ngokile lefatshe la gago;

o busitse botshwaro jwa ga Jakobe.

2O itshwaretse boikepo

jwa batho ba gago,

o bipile boleo jotlhe jwa bone. Sela.

3O tlositse kgalefo yotlhe ya gago;

o itshokolotse mo go tukeng

ga bogale jwa gago.

4Re sokologele,

Modimo wa poloko ya rona;

o khutlise kgakatsego ya gago

mo go rona.

5A o tlaa nna bogale le rona

ka bosakhutleng?

A o tlaa gololela bogale jwa gago

kwa tshikatshikeng?

6A ga o nka o re rudisa gape,

gore batho ba gago

ba itumele mo go wena?

7A ko o re supetse

boutlwelobotlhoko jwa gago Jehofa,

o re abele poloka ya gago.

8Ke tlaa utlwa se Modimo, Jehofa,

o tlaa se buang,

gonne o tlaa bua kagiso

le batho ba one,

le baitshepi ba one;

mme a ba se boele gape

mo boeleeleng.

9Ruri, poloka ya one e gaufi

le ba ba o boifang;

e le gore kgalalelo e age

mo lefatsheng la rona.

10Boutlwelobotlhoko bo kopanye

le boammaaruri;

tshiamo e atlanye le kagiso.

11Boammaaruri bo tswetswena

mo lefatsheng;

tshiamo le yone e okame

e le kwa legodimong.

12Ee, Jehofa o tlaa aba se se molemo;

le lefatshe la rona

le tlaa ntsha totafalo ya lone.

13Tshiamo e tlaa mo etelela pele;

mme e tlaa direla dikgato tsa gagwe

tsela ya go tsamaya mo go yone.