1Ke tlaa go ntshetsa malebogo
ka pelo yotlhe ya me;
fa pele ga medimo
ke tlaa go opelela dipako.
2Ke tlaa obama ke lebile tempele
ya gago e e boitshepo,
ke tlaa ntshetsa leina la gago
malebogo ka ntlha ya
mapelonomi a gago a lorato,
le ka ntlha ya boammaaruri
jwa gago;
gonne o godiseditse lefoko la gago
godimo ga leina la gago lotlhe fela.
3E rile mo letsatsing le ke biditseng
ka lone, wa nkaraba,
wa nnonofisa ka thata
mo moeng wa me.
4Dikgosi tsotlhe tsa lefatshe
di tlaa go ntshetsa malebogo, Jehofa,
gonne di utlwile mafoko
a molomo wa gago.
5Ee, di tlaa opela
ka ga ditsela tsa ga Jehofa;
gonne kgalelelo ya ga Jehofa e kgolo.
6Gonne le fa Jehofa a le godimo,
le fa go ntse jalo,
o tsaya tsia bangotlegi; mme
baipegi o ba itsetse kgakala fela.
7Le fa ke tsamaya mo gare ga tlalelo,
o tlaa nthudisa;
kgakalo ya baba ba me
o tlaa e otlololela letsogo la gago,
le seatla sa gago se segolo
se tlaa mpoloka.
8Jehofa o tlaa ntshweletsa
se se leng ka ga me;
boutlwelobotlhoko jwa gago, Jehofa,
bo eme ka bosakhutleng;
se tlhoboge ditiro
tse e leng tsa diatla tsa gago tota.
Who We AreWhat We EelieveWhat We Do
2025 by iamachristian.org,Inc All rights reserved.
