1Jehofa Modimo wa me
ke ikanya mo go wena;
mpoloka mo go bone botlhe
ba ba nkhukhelang, mme o nkgolole.
2O ka tla a gagola mowa wa me
jaaka tau,
a o gagoganyetsa ruri
ka go se ope yo o gololang.
3Jehofa Modimo wa me
e ka re fa ke dirile selo se;
fa go na le boikepo
mo diatleng tsa me;
4e re fa ke diretse ene yo o neng
a le kagiso le nna bosula;
(ee, ke golotse fela ene yo e neng
e le moganetsi wa me wa ka bomo);
5jalo a mmaba
a khukhele mowa wa me
mme a o tshware.
Ee, a a gatakele botshelo jwa me
mo mmung,
a beye kgalalelo ya me
mo loroleng. Sela.
6Tloga o eme Jehofa
ka bogale jwa gago;
itlotloanyetse tšhakgalo
ya baganetsi ba me;
o bo o nkubugele;
katlholo yone o e laotse.
7A phuthego ya ditšhaba
e go dikanyeletse;
mme o le fa godimo ga bone
o boele kwa go ba okameng.
8Jehofa o direla ditšhaba katlholo;
nkatlhola, Jehofa,
ka fa tshiamong ya me
le ka fa go tlhokeng molato ga me,
mo go nna.
9 Ao! A boikepo jwa baikepi
bo khutle,
mme o tlhomamise basiami;
gonne Modimo o o tshiamo
o leka dipelo le diphilo.
10Thebe ya me e mo Modimong
o o bolokang
ba ba pelo di thokgameng.
11Modimo ke moatlhodi
yo o siameng,
ee, one ke Modimo o o galefang
ka malatsi otlhe.
12Fa motho a sa sokologe,
o tlaa lootsa tšhaka ya one;
o obile bora jwa one, o bo laetse.
13Le gone o mmaakanyeditse
dibolao tsa loso;
o dira metswi ya one
go nna diphulo tse di molelo.
14Bonang, motho
yoo o mo pelegong ka boikepo;
ee, o ne a ithwele bosenyi,
mme o tsetse maaka.
15O dirile lemena a le epa,
o bile o wetse mo longopeng
lo o lo dirileng.
16Bosenyi jwa gagwe
bo tlaa boela mo tlhogong ya gagwe,
go tlaa fologela
mo phogong ya gagwe.
17Ke tlaa ntshetsa Jehofa malebogo
ka fa tshiamong ya gagwe;
le leina la ga Jehofa
yo o Mogodimodimo
ke tlaa le opelela pako.
Who We AreWhat We EelieveWhat We Do
2025 by iamachristian.org,Inc All rights reserved.
