1A go bakwe Jehofa,
lefika la me, yo o rutang
diatla tsa me go dira ntwa,
le menwana ya me go tlhabana.
2Bopelonomi jwa me jwa lorato,
le kago ya me ya phemelo;
kago e e godileng thata ya me
ya phemelo le mogolodi wa me;
thebe ya me e bile ke ene
yo ke mo ikanyang;
yo o fenyetsang batho ba me kwa
tlase ga me.
3 Jehofa, kana motho e be e le eng
fa e bo ne ne o mo tlhokometse
jaana?
Le morwa motho fa e bo ne ne
o mo kaya e le sengwe jaana?
4Motho o ntse jaaka lefela fela;
malatsi a gagwe a ntse
jaaka moriti o o fetelang koo.
5Jehofa, oba magodimo a gago,
mme o fologe, ama dithaba,
mme di tlaa kua mosi.
6Gadimisa dikgadima,
o ba phatlalatse;
ntsha metswi ya gago, o ba alole.
7Otlolola seatla sa gago
o le koo godimo; mphamola,
o ntshwatole mo metsing a magolo,
mo seatleng sa baeng;
8ba melomo ya bone
e buang boithamako;
le seatla sa bone se se siameng
ke seatla se se siameng sa maaka.
9Modimo,
ke tlaa go opelela sefela se seša;
ke tlaa go opelela dipako
ka seletso se se megala e le some.
10Ke one o o nayang dikgosi poloko;
o o falodisang Dafite,
motlhanka wa one
mo tšhakeng e e utlwisang botlhoko.
11Mphalodisa,
o nkgolole mo seatleng sa baeng
ba molomo wa bone
o buang boithamako,
ba seatla sa bone se se siameng
e leng seatla se se siameng sa maaka.
12E tlaa re bomorwaa rona
ba nna jaaka ditlhatshana
tse di godileng
mo bokaung jwa bone;
le bomorwadia rona
ba nna jaaka maje a kgokgotsho,
a a betlilweng
ka fa mokgweng wa ntlo ya segosi;
13e tlaa re matlo a rona
a polokelo a tletse,
go fitlhelwa dithoto
di le methalethale mo go one;
le manku a rona
a tsala makgolokgolo
mo mebileng ya rona;
14e tlaa re dipelesa tsa rona
di belesitse thata;
e tlaa re go tlhagela mo teng
le go thobela kwa ntle go seyo,
mme go se na legalo
mo mebileng ya rona;
15go bo go le sego tšhaba
e e mo boemong jo bo ntseng jalo;
ee, go sego tšhaba
e Modimo wa yone e leng Jehofa.
Who We AreWhat We EelieveWhat We Do
2025 by iamachristian.org,Inc All rights reserved.
