1Bakang Jehofa, lo bakeng
Jehofa lo le kwa magodimong;
mmakeng mo mafelong a a godimo.
2Mmakeng lona lotlhe baengele
ba gagwe; mmakeng lona lotlhe
masomosomo a gagwe.
3Lo mmakeng letsatsi le kgwedi;
lo mmakeng lona lotlhe
dinaledi tsa lesedi.
4Mmakeng lona magodimo
a magodimo, le lona metsi
a lo leng kwa godimo ga magodimo
5A tsotlhe di bake leina la ga Jehofa;
gonne o ne a laola,
mme tsa tlholega.
6Le gone
o di tlhomamiseditse bosakhutleng
le bosaengkae; o tlhomile molao
o o se ketlang o feta.
7Bakang Jehofa lo le mo lefatsheng,
lona maruarua,
le lona lotlhe madiba a a boteng;
8molelo le sefako;
kapoko le mouwane,
phefo e e matsubutsubu
e e dirafatsang lefoko la gagwe;
9dithaba le dithabana tsotlhe;
ditlhare tse di ungwang,
le masetara otlhe;
10diphologolo le dikgomo tsotlhe;
dilo tse di gagabang le dinonyane
tse di fofang;
11dikgosi tsa lefatshe
le ditšhaba tsotlhe; dikgosana
le baatlhodi botlhe ba lefatshe;
12makau a na le basetsana;
banna bagolo le banyana;
13a ba bake leina la ga Jehofa;
gonne leina la gagwe ke lone losi
le le goletsegileng;
kgalalelo ya gagwe
e godimo ga lefatshe le legodimo.
14O goleditse
lonaka lwa batho ba gagwe,
pako ya baitshepi ba gagwe botlhe;
e bong bana ba Iseraele,
e le tšhaba e e gaufi le ene.
Bakang Jehofa.
Who We AreWhat We EelieveWhat We Do
2025 by iamachristian.org,Inc All rights reserved.
