MORERI 11 - SetswanaTswana 1908/1992（TSW08NO）

Ditiro tse monna yo o botlhale o di dirang

1Latlhela dijo tsa gago

mo metsing,

gonne o tlaa di bona

morago ga malatsi a le mantsi.

2Naya batho ba supa kabelo,

ee, le ba fera mebedi;

gonne ga o itse go re go tlaa nna

bosula bofe mo lefatsheng.

3Fa maru a tletse pula,

a tle a ithele mo lefatsheng;

mme fa setlhare se wela ntlheng ya borwa,

kgotsa ntlheng ya botsheka,

mo felong fa setlhare se welang gone,

se tlaa namalala gone fela.

4Ene yo o tlhokometseng phefo

ga a ketla a jala;

le yo o gopolang maru

ga a ketla a roba.

5E re ka o sa itse tsela ya phefo, le fa e le ka fa marapo a golang ka gone mo sebopelong sa yo o moimana; fela jalo ga o itse ditiro tsa Modimo o o dirang gotlhe fela.

6Mo mosong o jale peo ya gago, mme mo maitseboeng o se ka wa ikgogona letsogo; gonne ga o itse e e tlaa tlhomamang, eno, kgotsa ele, kgotsa a di tlaa nna molemo tsoo pedi tsa tshwana fela.

7Ruri lesedi le monate; mme ke se se kgatlhang fa matlho a leba letsatsi.

8Ee, fa motho a tshela dinyaga di le dintsi, a a itumele mo go tsone tsotlhe; mme a gakologelwe metlha ya lefifi, gonne e tlaa nna mentsi. Gotlhe mo go tlang ke boithamako fela.

Tlhagiso go baša

9Itumele, wena lekau, mo bokaung jwa gago; a pelo ya gago e go jese monate mo metlheng ya bokau jwa gago, mme o sepele mo ditseleng tsa pelo ya gago, le mo ponong ya matlho a gago; mme o bo o itse fa Modimo o tlaa go isa tshekong ka ga dilo tse tsotlhe fela.

10Ke gone o tlose bohutsana mo pelong ya gago, o bo o tlose bosula mo nameng ya gago: gonne bokau le bonna jo bo tletseng ke boithamako fela.