1Shefatia morwa Matane, le Getalia morwa Pašure, le Jokale morwa Shelemia, le Pašure morwa Malakia, ba utlwa mafoko a Jeremia o a buileng le batho botlhe, a re:
2“Jehofa o bua jaana, a re: Yo o nnang mo motseng o, o tlaa swa ka tšhaka, ka popamo le ka kgogodi; mme yo o tswelang kwa Bakalateeng o tlaa tshela; botshelo jwa gagwe bo tlaa nna mo go ene kgapo ya gagwe, mme o tlaa tshela.
3Jehofa o bua jaana, a re: ‘Ruri motse o, o tlaa tsenngwa mo seatleng sa ntwa ya kgosi ya Babilone, mme o tlaa o gapa.’ ”
4Foo dikgosana tsa raya kgosi tsa re: “Re a go rapela, a monna yo a bolawe; ka a repisa mabogo a batlhabani ba ba setseng mo motseng o, le mabogo a batho botlhe, ka a bua mafoko a a ntseng jaana nabo; ka go bo monna yo, ga a batle tlhogonolofalo ya batho ba, fa e se kutlwisobotlhoko fela.”
5Setekia kgosi, a re: “Bonang, o mo seatleng sa lona; gonne kgosi ga se ene yo o ka dirang sengwe se lo sa se rateng.”
6Foo ba tsaya Jeremia, ba mo latlhela mo moleteng wa ga Malakia morwa kgosi, e le molete o o mo lwapeng lwa balebedi; ba folosa Jeremia ka megala. Mo moleteng go ne go se na metsi fa e se loraga fela; Jeremia a roromela mo lorageng.
7Jaana e rile Ebete-meleke wa Moethiopia, e le moopafadiwa yo o ne a le mo ntlong ya kgosi, a utlwa fa ba tsentse Jeremia mo moleteng; kgosi yone e dutse fa kgorong ya Benjamine;
8Ebete-meleke a tswa mo ntlong ya kgosi a ya a bua le kgosi, a re:
9“Kgosi, morena wa me, banna bao ba dirile bosula mo go tsotlhe tse ba di diretseng Jeremia moperofeti; yo ba mo latlhetseng mo moleteng; o ka tla a swela mo felong kwa o gone ka ntlha ya tlala; gonne ga go tlhole go na le dijo mo motseng.”
10Foo kgosi ya laola Ebete-meleke wa Moethiopia, ya re: “Tsaya fano banna ba le 30, o ye o ntshe Jeremia moperofeti mo moleteng a ise a swe.”
11Jalo Ebete-meleke a tsaya banna bao, a ya a tsena mo ntlong ya kgosi fa tlase ga ntlo ya dikhumo, a tsaya teng dikatana tse di latlhilweng, le diaparo tse di dibodu, a di folosetsa kwa go Jeremia mo moleteng ka megala.
12Jalo Ebete-meleke wa Moethiopia a raya Jeremia a re: “A ko o ithathelele dikatana tse, le diaparo tse di dibodu mo magwafeng a gago fa tlase ga megala.” Jeremia a dira jalo.
13Jalo ba goga Jeremia ka megala, ba mo ntsha mo moleteng; Jeremia a sala a le mo lwapeng lwa balebedi.
Setekia o kopa tlhagiso mo go Jeremia14Foo Setekia kgosi a roma a ya go tlisa Jeremia moperofeti kwa go ene, kwa botsenong jwa boraro jo bo mo ntlong ya ga Jehofa; kgosi ya raya Jeremia ya re: “Ke tlaa go botsa sengwe; o se ka wa ntobela sepe.”
15Foo Jeremia a raya Setekia a re: “Fa ke se go bolelela, a jaana ga o tlaa mpolaela ruri? Le gone fa ke go gakolola, ga o ketla o ntheetsa.”
16Jalo Setekia kgosi a ikanela Jeremia mo sephiring, a re: “Jaaka Jehofa a tshedile, yo o re dirileng mowa o, ga nketla ke go bolaya, le gone ga nketla ke go tsenya mo seatleng sa banna ba, ba ba senkang botshelo jwa gago.”
17Foo Jeremia a raya Setekia a re: “Jehofa, Modimo wa masomosomo, Modimo wa Iseraele o bua jaana, a re: ‘Fa o tswela kwa dikgosaneng tsa kgosi ya Babilone, foo mowa wa gago o tlaa tshela, mme motse o, ga o ketla o fisiwa ka molelo; o tlaa tshela le ba ntlo ya gago.
18Mme fa o gana go tswela kwa dikgosaneng tsa kgosi ya Babilone, foo motse o, o tlaa tsenngwa mo seatleng sa Bakalatea; ba tlaa o fisa ka molelo, mme ga o ketla o falola mo seatleng sa bone.’ ”
19Setekia kgosi a raya Jeremia, a re: “Ke boifa Bajuta ba ba ngwegetseng kwa Bakalateeng, ba ka tla ba ntsenya mo seatleng sa bone, mme ba ntshotla.”
20Jeremia, a re: “Ga ba ketla ba go tsenya. Ke a go rapela, a ko o utlwe fela lentswe la ga Jehofa, mo go se ke se buang nao; jalo go tlaa nna molemo mo go wena, le mowa wa gago o tlaa tshela.
21Fa o gana go tswa, le ke lone lefoko le Jehofa o le ntshupeditseng:
22Bona, basadi botlhe ba ba setseng mo ntlong ya kgosi ya Juta, ba tlaa ntshediwa kwa dikgosaneng tsa kgosi ya Babilone, mme basadi bao ba tlaa bua ba re:
“ ‘Ditsala tsa gago tse dikgolo
di go forile, di go fentse;
jaanong ka dinao tsa gago
di rorometse mo lorageng,
ditsala di go fularetse.’
23“Ba tlaa ntshetsa Bakalatea basadi botlhe ba gago, le bana ba gago; ga o ketla o falola mo seatleng sa bone, mme o tlaa tshwarwa ka letsogo ke kgosi ya Babilone; mme o tlaa bo o ba fisisa motse o ka molelo.”
24Foo Setekia a raya Jeremia, a re: “A go se itse ope ka ga mafoko a, mme ga o ketla oo swa.
25Fa dikgosana di utlwa fa ke buile nao, di tlaa tla mo go wena di go raya di re: ‘A ko o re bolelele se o se buileng le kgosi; o se ka wa se re lobela, ga re ketla re go bolaya; le se kgosi e se buileng nao o se re bolelele.’
26Foo o di reye, o re: ‘Ke isitse mokokotlelo wa me fa pele ga kgosi, gore e se ka ya mpusetsa kwa ntlong ya ga Jonathane ka ya go swela teng.’ ”
27Foo dikgosana tsotlhe tsa tla mo go Jeremia tsa mmotsa; mme a di bolelela ka fa mafokong otlhe a kgosi e a laotseng. Mme tsa khutla go bua nae, gonne selo seo se ne se sa lemogwa.
28 Jalo Jeremia a nna mo lwapeng lwa balebedi go ya go fitlha mo tsatsing le Jerusalema o gapilweng ka lone.
Who We AreWhat We EelieveWhat We Do
2025 by iamachristian.org,Inc All rights reserved.
