1 SAMUELE 24 - SetswanaTswana 1908/1992（TSW08NO）

Dafite o rekegela botshelo jwa ga Saule

1Ga dirala e rile Saule a sena go bowa kwa go latelang Bafilisitia, a bolelelwa ga twe: “Bona, Dafite o mo nageng ya Enegedi.”

2Foo Saule a tsaya banna ba ba tlhophegileng ba Iseraele ba le 3 000, a ya go senka Dafite le banna ba gagwe mo mafikeng a a nnwang ke dipodi tsa naga.

3 A fitlha fa marakeng a dinku mo tseleng, kwa go nang le logaga gone; mme Saule a tsena gone a ya go ithoma. Jaana Dafite le banna ba gagwe ba bo ba ntse kwa tengteng ga logaga.

4Banna ba ga Dafite ba mo raya ba re: “Bona, letsatsi le Jehofa o ne a bua nao ka ga lone ke le, a re: ‘Bona, ke tlaa tsenya mmaba wa gago mo seatleng sa gago, mme o tlaa mo direla ka fa go tlaa nnang molemo mo matlhong a gago ka gone.’ ” Foo Dafite a nanoga a kgaola lokoja lwa kobo ya ga Saule, Saule a sa itse.

5Ga dirala ya re morago ga moo, pelo ya ga Dafite ya ikwatlhaya, ka a kgaotse lokoja lwa ga Saule.

6 Mme a raya banna ba gagwe a re: “A go se tualo fa nka direla morena wa me selo se, e le motlodiwa wa ga Jehofa, ke ka mo ntshetsa letsogo la me, ka a le motlodiwa wa ga Jehofa.”

7Dafite a kganela banna ba gagwe ka mafoko a, a se ka a ba leseletsa go tsogela Saule. Saule a nanoga mo logageng, a tsamaya.

8Dafite le ene a nanoga morago ga moo, a tswa mo logageng, a tlhaeletsa kwa go Saule, a re: “Morena wa me, kgosi.” E rile Saule a gadima, Dafite a inamela fa fatshe ka sefatlhogo, a ikoba.

9Dafite a raya Saule a re: “Ana o reeletsang mafoko a batho, fa ba re: ‘Bona, Dafite o senka go go utlwisa botlhoko’?

10Bona, gompieno matlho a gago a bonye jaaka Jehofa a ne a go tsentse mo seatleng sa me mo logageng; bangwe ba ne ba re ke go bolaye, mme leitlho la me la go rekegela; ka re: ‘Ga nketla ke ntshetsa morena wa me letsogo; gonne ke ene motlodiwa wa ga Jehofa.’

11Gape rra, bona, ee, o bone lokoja lwa kobo ya gago mo seatleng sa me; gonne e re ka ke kgaotse lokoja lwa kobo ya gago, mme ke se ka ka go bolaya, o itse o bo o bone, fa go se na bosula le fa e le tlolo mo seatleng sa me; ga ke a go leofela, le fa o tsoma mowa wa me go tla o o tshwara.

12A Jehofa a atlhole gare ga me le wena, a Jehofa a mpusolosetse mo go wena; seatla sa me ga se ketla se nna mo go wena.

13Go ntse jaaka seane sa ba bogologolo se bua se re: ‘Boikepo bo tswa mo baikeping;’ mme seatla sa me ga se ketla se nna mo go wena.

14 Ana kgosi ya Iseraele e bololetse mang? O tsoma mang? A ke ntša e e suleng, a ke letsetse?

15Ke gone a Jehofa a nne moatlhodi, a atlhole gare ga me le wena, mme a a bone, a ntshekele, a nkgolole mo seatleng sa gago.”

16Ga dirala e rile Dafite a sena go khutla go bua mafoko ao le Saule, Saule a re: “A ke lone lentswe la gago morwaaka Dafite?” Saule a tsholetsa lentswe la gagwe, a lela.

17A raya Dafite a re: “O siame bogolo go nna; gonne o ntiretse molemo, mme nna ke go diretse bosula.

18O boletse gompieno jaaka o ntiretse molemo, gonne e rile ka Jehofa a ne a ntsentse mo seatleng sa gago wa se ka wa mpolaya.

19Gonne fa monna a fitlhela mmaba wa gagwe, a o a tle a mo lese a tsamaya sentle? Ke gone Jehofa a go duele ka molemo ka ntlha ya se o se ntiretseng gompieno.

20Jaana, ke a itse fa ka mmaanete o tlaa nna kgosi, le gore bogosi jwa Iseraele bo tlaa nitamisiwa mo seatleng sa gago.

21Ke gone ka re, inkanele ka Jehofa, fa o se ketla o tlosa losika lwa me morago ga me, le go re ga o ketla o nyeletsa leina la me mo ntlong ya ga rre.”

22Mme Dafite a ikanela Saule. Saule a ya gae; Dafite le banna ba gagwe ba tlhatlogela kwa felong fa go thata.