1Mo metlheng ya morago
go tlaa dirala go re,
thaba ya ntlo ya ga Jehofa
e tlaa tlhomamisiwa
mo tlhoreng tsa dithaba,
e tlaa golediwa
mo godimo ga makhubu;
mme ditšhaba
di tlaa sailela kwa go yone.
2Merafe e le mentsi
e tlaa fitlha, e re:
“Ntlong, a re tlhatlogeleng
kwa thabeng ya ga Jehofa
le kwa ntlong ya Modimo
wa ga Jakobe;
o tlaa re ruta ditsela tsa one,
mme re tlaa sepela
mo ditselaneng tsa one;
gonne molao o tlaa tswa mo Sione,
le lefoko la ga Jehofa
mo Jerusalema.”
3 O tlaa atlhola fa gare ga
ditšhaba di le dintsi,
o tlaa kgalemela
merafe e e thata e e kwa kgakala;
mme ba tlaa thula ditšhaka tsa bone
megoma,
le marumo a bone dithipa
tse di segang mabele;
morafe ga o ketla o ekela
morafe o mongwe tšhaka,
le gone ga ba ketla ba tlhola
ba ithuta ntwa gope.
4 Mongwe le mongwe wa bone
o tlaa dula fa tlase
ga mofine wa gagwe,
le fa tlase ga mofeige wa gagwe;
ope ga a ketla a ba boifisa;
gonne molomo wa ga Jehofa
wa masomosomo o se buile.
5Gonne batho ba ditšhaba tsotlhe ba tlaa sepela, mongwe le mongwe ka leina la modimo wa gagwe, mme rona re tlaa sepela ka leina la ga Jehofa Modimo wa rona, ka bosakhutleng le ka bosaengkae.
Baiseraele ba tlaa boa mo botshwarong6“E tlaa re mo motlheng oo,”
go bua Jehofa:
“Ke tlaa kokoanya
ene yo o tlhotsang,
ke phutha ene yo o lelekilweng,
le ene yo ke mo patikileng.
7Ene yo o ne a tlhotsa
ke tlaa mo dira masalela,
le ene
yo o ne a latlhetswe kwa kgakala
ke tlaa mo dira morafe o o thata;
Jehofa o tlaa ba busa
mo thabeng ya Sione
go tloga fano
le go ya bosakhutleng.
8Wena kago e e goletseng godimo
ya letsomane,
lekhubu la morwadia Sione,
go tlaa tla mo go wena;
ee, mmuso wa pele o tlaa tla,
bogosi jwa morwadia Jerusalema.”
9Ana o kuelelang godimo?
A ga go na kgosi mo go wena, ee,
a mogakolodi wa gago o sule,
fa e bo ne ne
metlotsedi e go tshwere jaana
jaaka ekete ya mosadi
yo o mo pelegong?
10O nne botlhoko,
mme o leke go belega,
wena morwadia Sione,
jaaka mosadi yo o mo pelegong;
gonne jaanong
o tlaa tswa mo motseng
o aga mo nageng,
o tlaa fitlha le kwa Babilone;
o tlaa falodisiwa teng koo;
Jehofa o tlaa go rekolola teng
mo seatleng sa baba ba gago.
11Jaana merafe e le mentsi
e go phuthegetse, e e reng:
“A a leswefadiwe,
mme a leitlho la rona
le bone keletso ya lone mo Sione.”
12Mme ga ba itse
megopolo ya ga Jehofa,
le gone ga ba tlhaloganye
kgakololo ya gagwe;
gonne o ba kokoanyeditse
mo seboping
jaaka dingata tsa mabele.
13“Nanoga, o phothe,
wena morwadia Sione,
gonne ke tlaa dira lonaka
lwa gago tshipi,
le ditlhako tsa gago kgotlho,
mme o tlaa thubaganya ditšhaba
di le dintsi;”
mme tlhwatlhwa ya bone
o tlaa e naya Jehofa,
le thoto ya bone o tlaa e naya
Jehofa wa lefatshe lotlhe.
Who We AreWhat We EelieveWhat We Do
2025 by iamachristian.org,Inc All rights reserved.
