1 SAMUELE 26 - SetswanaTswana 1908/1992（TSW08NO）

Dafite o rekegela botshelo jwa ga Saule gape

1 Basife ba tla mo go Saule kwa Gibea, ba re: “A Dafite ga a a iphitlha mo thabeng ya Hakila, e e lebaganyeng le naga?”

2Foo Saule a nanoga a fologela kwa nageng ya Sife a na le banna ba ba tlhophegileng ba Iseraele ba le 3 000, a ya go senka Dafite mo nageng ya Sife.

3Saule a thibelela mo thabaneng ya Hakila e e lebaganyeng le naga fa tseleng. Dafite a bo a ntse mo nageng, mme a bona fa Saule a mo latelela kwa nageng.

4Ka ntlha ya moo Dafite a ntsha ditlhola, a lemoga fa Saule a tsile ka mmaanete.

5Dafite a nanoga, a tla mo felong fa Saule o thibeletseng gone; Dafite a bona fa Saule o robalang gone le Abenere morwa Nere, molaodi wa ntwa ya gagwe; Saule a robala ka fa teng ga maemo a makoloi, batho ba thibelela tikologong ya gagwe.

6Foo Dafite a bua, a raya Ahimeleke wa Mohite, le Abišai morwa Seruja monnaa Joabe a re: “E mang yo o tlaa yang le nna kwa go Saule kwa bothibelelong?” Abišai a re: “Ke tlaa ya nao.”

7Dafite le Abišai ba tla mo bathong bosigo; mme Saule a bo a robetse ka fa teng ga maemo a makoloi, lerumo la gagwe a le tlhomile mo mmung fa tlhogong ya gagwe; Abenere le batho ba bo ba robetse tikologong ya gagwe.

8Foo Abišai a raya Dafite a re: “Modimo o tsentse mmaba wa gago mo seatleng sa gago gompieno; jaana ka re, ke a go rapela, o mme ke mo tlhabe ka lerumo ke mo tlhabele fa fatshe gangwe fela, ga nketla ke mo tlhaba gabedi.”

9Mme Dafite a raya Abišai a re: “O se ka wa mo senya; gonne mang yo o ka ntshetsang motlodiwa wa ga Jehofa letsogo, mme a tlhoka go nna molato?”

10Dafite a re: “Jaaka Jehofa a tshedile, Jehofa o tlaa mo itaya; gongwe letsatsi la gagwe la go swa le tlaa tla; gongwe o tlaa ya mo tlhabanong, mme a swe.

11 A go se nne jalo fa nka ntshetsa motlodiwa wa ga Jehofa letsogo; jaana ke a go rapela, a ko o tseye lerumo le le fa tlhogong ya gagwe, le kurwana ya metsi, mme re tsamaye.”

12Dafite a tsaya lerumo le kurwana ya metsi fa tlhogong ya ga Saule; ba tsamaya, mme ope a se ka a kubuga, ka ba ne ba robetse botlhe; ka gobo boroko jo bogolo jo bo tswang mo go Jehofa bo no bo ba wetse.

13Foo Dafite a kgabaganyetsa ntlheng e nngwe, a ema mo godimo ga thaba kwa kgakala; go le sebaka se setona fa gare ga bone.

14Dafite a tlhaeletsa kwa bathong, le Abenere morwa Nere a re: “A ga o arabe wena Abenere?” Foo Abenere a araba a re: “O mang wena yo o tlhaeleletsang kwa kgosing?”

15Dafite a raya Abenere a re: “A ga o monna yo o pelokgale? Go na le mang yo o tshwanang nao mo Iseraele? Ke ka ntlha yang o se ka wa lebela kgosi morena wa gago? Gonne go ile ga tsena motho mongwe a ya go senya kgosi morena wa gago.

16Selo se o se dirileng ga se molemo. Jaaka Jehofa a tshedile, lo tshwanetse go swa, ka lo se ka lwa lebela morena wa lona, motlodiwa wa Jehofa. Jaana batla lerumo la kgosi kwa le gone, le kurwana ya metsi e e neng e le fa tlhogong ya yone.”

17Saule a itse lentswe la ga Dafite, mme a re: “A ke lone lentswe la gago, morwaaka Dafite?” Dafite a re: “Ke lentswe la me, kgosi morena wa me.”

18A ba a re: “Ke ka ntlha yang fa morena wa me a konatelela motlhanka wa gagwe? Gonne ke dirileng? Kgotsa go na le bosula bofe mo seatleng sa me?

19Ke gone, ke a go rapela, a kgosi morena wa me a utlwe mafoko a motlhanka wa gagwe. Fa e le Jehofa yo o go ntlhotlheleleditseng, a a ke a amogele tshupelo; mme fa e le bana ba batho, a ba hutsege fa pele ga Jehofa; gonne ba ntelekile gompieno, gore ke se ka ka ngaparela boswa jwa ga Jehofa, ba re: ‘Ke tsamaye, ke ye go direla medimo e sele.’

20Jaana ka re, a madi a me a se wele fa fatshe ke le go sele ke se fa pele ga Jehofa; gonne kgosi ya Iseraele e bolotse e tsile go senka letsetse fela, go tshwana jaaka fa mongwe a tsoma lesogo mo dithabeng.”

21Foo Saule a re: “Ke leofile; boa morwaaka Dafite; gonne ga nketla ke tlhola ke go utlwisa botlhoko, ka botshelo jwa me bo ile jwa ratega mo matlhong a gago gompieno; bona, ke itirile seeleele, ke bile ke timetse thata.”

22Dafite a mo fetola a re: “Bona lerumo ke le kgosi! A lekau lengwe le kgabaganye le tle go le tsaya.

23Jehofa o tlaa lefela mongwe le mongwe tshiamo ya gagwe le boikanngo jwa gagwe; gonne Jehofa o ne a go tsentse mo seatleng sa me gompieno, mme ka gana go ntshetsa motlodiwa wa ga Jehofa letsogo la me.

24Jaaka botshelo jwa gago bo ne bo kaiwa segolo mo matlhong a me gompieno, a botshelo jwa me bo kaiwe segolo jalo mo matlhong a ga Jehofa, a nkgolole mo bohutsaneng jotlhe.”

25Foo Saule a raya Dafite a re: “O nne sego morwaaka, Dafite; o tlaa dira ka bonatla, ruri o tlaa fenya.” Mme Dafite a tsamaya, Saule le ene a boela felong ga gagwe.