1 A ko lo ntshetseng Jehofa
malebogo; gonne o molemo,
gonne boutlwelobotlhoko jwa gagwe
bo eme ka bosakhutleng.
2A jaanong Iseraele a bue, a re:
“Boutlwelobotlhoko jwa gagwe
bo eme ka bosakhutleng.”
3A jaanong ntlo ya ga Arone
e bue e re:
“Boutlwelobotlhoko jwa gagwe
bo eme ka bosakhutleng.”
4A jaanong ba ba boifang Jehofa
ba bue ba re:
“Boutlwelobotlhoko jwa gagwe
bo eme ka bosakhutleng.”
5Ke ne ka bitsa leina la ga Jehofa
mo pitlaganong ya me;
Jehofa a nkaraba, mme a mpaya
mo felong fa go atlhameng.
6 Jehofa o ntlheng ya me;
ga nketla ke boifa;
kana motho o ka ntirang?
7Jehofa o ntlheng ya me
mo go ba ba nthusang;
ke gone ka mo
ke tlaa bonang keletso ya me
mo go ba ba nkilang.
8Go molemo go ikanya Jehofa
bogolo go go ikanya motho.
9Go molemo go ikanya Jehofa
bogolo go go ikanya dikgosana.
10Merafe yotlhe e kile
ya ntikanyeletsa; mo ineng
la ga Jehofa ke tlaa e pomaganya.
11E ne ya ntikanyeletsa;
ee, ya ntikanyeletsa;
mo ineng la ga Jehofa
ke tlaa e pomaganya.
12Ya ntikanyeletsa
jaaka dintshi tsa dinotshe;
e timilwe jaaka molelo wa mitlwa;
mo ineng la ga Jehofa
ke tlaa e pomaganya.
13O ne wa nkhutla thata
gore ke we;
mme Jehofa a nthusa.
14 Jehofa ke thata ya me le kopelo;
mme o diregile poloka ya me.
15Lentswe la tuduetso le la poloko
le mo megopeng ya basiami:
“Seatla se segolo sa ga Jehofa
se dira ka bonatla.
16Seatla se segolo sa ga Jehofa
se goletsegile; seatla se segolo
sa ga Jehofa se dira ka bonatla.”
17Ga nketla ke swa, ke tlaa tshela,
ke ba ke bolela ditiro tsa ga Jehofa.
18Jehofa o nkwatlhaile mo go
botlhoko;
mme ga a a nneela losong.
19Mpulela dikgoro tsa tshiamo;
ke tlaa tsena ka tsone,
ke tlaa ntshetsa Jehofa malebogo.
20Kgoro e, ke ya ga Jehofa;
basiami ba tlaa tsena ka yone.
21Ke tlaa go ntshetsa malebogo,
ka gobo o nkarabile,
o bile o diregile poloka ya me.
22 Lentswe le baagi ba le ganneng,
le diregile tlhogo ya kgokgotšho.
23Mo, ke mo go dirilweng ke Jehofa;
go a gakgamatsa mo matlhong a
rona.
24Le, ke letsatsi
le Jehofa o le dirileng;
re tlaa itumela,
re ipela mo go lone.
25 Boloka jaanong Jehofa,
re a go rapela;
Jehofa, re a go rapela,
tlisa letlhogonolo jaanong.
26 Go sego yo o tlang
mo ineng la ga Jehofa;
re lo segofaditse
re le mo ntlong ya ga Jehofa.
27Jehofa ke Modimo,
mme o re neile lesedi;
bofang setlhabelo ka dikgole,
lo se bofelele le mo go tse e leng
dinaka tsa sebeso.
28Wena o Modimo wa me,
ke tlaa go ntshetsa malebogo;
o Modimo wa me
ke tlaa go goletsa.
29A ko lo ntshetse Jehofa malebogo,
gonne o molemo;
boutlwelobotlhoko jwa gagwe
bo eme ka bosakhutleng.
Who We AreWhat We EelieveWhat We Do
2025 by iamachristian.org,Inc All rights reserved.
