1Gomotsang, gomotsang
batho ba me,
go bua Modimo wa lona.
2Lo bue ka kgomotso le Jerusalema,
mme lo mo kuele go re,
tlhabang ya gagwe e sweditswe,
le go re, boikepo jwa gagwe
bo itshwaretswe; le go re,
o amogetse mo seatleng sa ga Jehofa
sebedi ka ga maleo otlhe a gagwe.
3 Lentswe la mongwe yo o goang, a re:
“Baakanyang tsela ya ga Jehofa
mo nageng,
lo siamisetse Modimo wa rona
tsela ya mheru mo sekakeng.
4Mogogoro mongwe le mongwe
o tlaa katesegela,
le thaba nngwe le nngwe,
le lekhubu,
di tlaa kokobediwa;
fa go sokameng go tlaa lolamisiwa,
le mafelo a a magwata
a tlaa papanwa;
5le kgalalelo ya ga Jehofa
e tlaa senolwa,
nama yotlhe e tlaa e bona mmogo;
gonne molomo wa ga Jehofa
o se buile.”
6 Lentswe la mongwe la re: “Goa.”
Mme mongwe a re:
“Ke tlaa goang?”
Nama yotlhe ke bojang;
le bontle jotlhe jwa yone
bo ntse jaaka sethunya sa naga.
7Bojang bo tle bo omelele,
sethunya se swabe,
ka go bo di fokwa ke mowa
wa ga Jehofa;
ruri batho ke bojang.
8Bojang bo tle bo omelele,
sethunya se swabe;
mme lefoko la Modimo wa rona
le tlaa ema ka bosakhutleng.
9Wena yo o bolelelang Sione
mafoko a a molemo,
palama mo thabeng e e godileng;
wena yo o bolelelang Jerusalema
mafoko a a molemo,
tsholetsa lentswe la gago ka thata;
le tsholetse, o se ka wa boifa;
raya metse ya Juta, o re:
“Bonang, Modimo wa lona!”
10 Bonang, Morena Modimo
o tlaa tla jaaka mothata,
mme letsogo la gagwe
le tlaa mmusetsa;
bonang, tuelo ya gagwe o na nayo,
le tefetso ya gagwe
e fa pele ga gagwe.
11 O tlaa fudisa letsomane la gagwe
jaaka modisa;
o tlaa phuthela dikwanyana
mo letsogong la gagwe,
a di gara mo sehubeng sa gagwe,
tse di amusang
o tlaa di tsamaisa ka pepetletso.
Modimo wa Iseraele o o sa lekaneng le ope12E mang yo o lekantseng metsi
mo khuting ya seatla sa gagwe,
a lekanya legodimo
ka go paralatsa menwana ya gagwe,
a tlhaloganya lorole lwa lefatshe
ka seelo,
a lekanya bokete jwa dithaba
mo tekanyetsong,
le jwa makhubu
mo selekanyong se se pegang?
13 E mang yo o kaetseng
mowa wa ga Jehofa,
gongwe a mo ruta
e le mogakolodi wa gagwe?
14O ne a gakololana le mang,
mme ke mang yo o mo kaetseng,
a mo ruta tsela ya katlholo,
a mo ruta kitso,
a mo supetsa tsela ya tlhaloganyo?
15Bonang, merafe e ntse jaaka
lerothodi la nkgwana fela;
e kaiwa jaaka lorojanyana
lo lo mo selekanyong se se pegang;
bonang, o tsholetsa ditlhake
jaaka selonyana se sennye fela.
16Lebanone ga o a lekana molelo,
le ditshedi tsa gone
ga di a lekana go nna
tshupelo ya phiso.
17Merafe yotlhe fela e ntse jaaka
e seng sepe fa pele ga gagwe;
e kaiwa ke ene
go re ke mo go seng sepe,
e le lefela fela.
18 Foo lo a bo lo ka tshwantsha
Modimo le mang?
Gongwe setshwantsho ke sefe
se lo tlaa bong
lo se tshwantsha le one?
19Setshwantsho se se setilweng,
aitse modiri o kile a se tlhapolosa;
mothudi wa gouta
a se manega gouta,
a se tshelela bompolokwane
ba selefera.
20Ene yo o humanegileng mo gogolo,
mme a paletswe ke seromololo
se se ntseng jalo,
o itshenkela setlhare
se se se ketlang se bola;
a itshenkele modiri yo setswerere
go tla a baakanya
setshwantsho se se setilweng,
se se se ketlang se reketla.
21A ga lo ise lo ko lo itse?
A ga lo ise lo ko lo utlwe?
A ga lo a go bolelelwa
le mo tshimologong?
A ga lo a tlhaloganya
e sa le ka go thaiwa
ga lefatshe?
22Ke ene yo o dutseng
mo go okameng lefatshe,
mme banni ba lone
ba ntse jaaka ditsiakgope fela;
yo o phuthololang magodimo
jaaka sesiro,
a a tsharolole
jaaka mogope o o nnwang.
23Yo o dirang dikgosana bosengsepe;
a dire baatlhodi ba lefatshe
go nna jaaka lefela fela.
24Ee, ga ba a tlhongwa;
ee, ga ba a jalwa;
ee, dithito tsa bone
ga di a namela mo mmung;
gape a ba fokele, mme ba swabe,
sefefo se ba gogole jaaka dirite.
25Foo lo a bo lo ka ntshwantsha le
mang fa ke ka lekana nae?
Go bua Moitshepi.
26Kalelang matlho a lona godimo,
lo bone yo o tlhodileng dilo tse,
yo o bolotsang lesomosomo la tsone
ka palo;
o di bitsa tsotlhe ka maina;
ke ka bogolo jwa nonofo ya gagwe,
le ka go bo a nonofile mo thateng,
fa go se sepe se se tlhokafalang.
27Jakobe, wa reng?
O buelang Iseraele o re:
“Tsela ya me e fitlhegetse Jehofa,
le katlholo ya me
e fetile mo Modimong wa me”?
28A ga o ise o itse?
A ga o ise o utlwe?
Modimo o o sa khutleng,
Jehofa Motlhodi wa dikhutlo
tsa lefatshe, ga a idibale,
ga a lape;
tlhaloganyo ya gagwe
ga e na go tlhotlhomisiwa gope.
29O naya baidibadi thata;
le ene yo o se nang thata
o mo totisetse nonofo.
30Ba e leng makau
ba tlaa idibala ba lapa,
le makolwane a tlaa phuaganela ruri;
31mme ba ba lebelelang mo go Jehofa
ba tlaa šafatsa thata ya bone;
ba tlaa tlhatloga ka diphuka
jaaka bontswi ba batona;
ba tlaa siana ba sa lape;
ba tlaa tsamaya ka dinao,
ba sa idibale.
Who We AreWhat We EelieveWhat We Do
2025 by iamachristian.org,Inc All rights reserved.
